Abezomvikela abagoqela amasotsha lamapholisa aweZimbabwe asolwa ngabanengi elizweni laphandle kwelizwe ngokuqhubekela phambili bebopha, bethumba lokutshaya abantu emizini eminengi yedolobheni lakoBulawayo.
Abantu abatshaywe babotshwa ngabezomvikela ngoLwesithathu langoLwesine elokitshini leMakokoba koBulawayo bamiswe phambi komthethwandaba kamantshi koBulawayo eTredgold.
UMantshi, uMnu. Tinashe Tashaya, uzwe okwakuqala icala lezibotshwa uLeon Ncube , uKelvin Dube loCourage Bester Mnkandla abatshaywe kabuhlungu ngabezomvikela bababopha eMakokoba ngemva kokumiswa kwemotha akade bekuyo bakhuthuzwa bacina besetheswa icala lokutholakala belezidakamizwa.
Igqwetha uMnu. Nqobani Sithole umele uNcube, kuthi uMnu. Mlweliwenkululeko Dube, umele uDube loMnkandla edale lapho abavunyelwe ukuhlawula imali yesibambiso sebail lamadollar alikhulu umuntu munye ngamunye.
UMantshi Tashaya ukhuthaze uhulumende ukuba ayephenyisisa ngodaba lolu kabanzi aze lobufakazi obeneleyo mayelana lezibotshwa bubhaliwe kahle ngoba okukhona okwamanye kuveza ukuba babotshwe libutho ngaphandle komthetho.
Izibotshwa zibonise idale imvimvinya abalazo kulandela ukutshwaywa libutho ngoLwesithathu.
UMnu Sithole uthi, “Izibotshwa zize edale zibotshwe okungekho emthethweni libutho njalo lokhu sikubeke sobala edale. Batshaywe kabuhlungu libutho njalo lemizimba yabo iyabonisa ngakho inkundla isithe kuyecwayisiswa kabanzi uma kuphuma mngceke ukuthi lababantu babotshwe libutho akumelanga bayemiswa njalo edale bathonisiswe.”
Kusenjalo, ukubotshwa lokuthunjwa kwabantu kuqhubekela phambili edolobheni lakoBulawayo lapho isikhulumeli seZAPU, uMnu. Iphithule Maphosa, athi abebutho babikwa befike bemdinga ebusuku emzini wakhe yena engekho.
“Ibutho elihlomileyo libikwa lifike lingidinga lapho engihlala khona langiswela kulandela ukutshengisela okukhona mina bengivele ngingekho elizweni ngesikhathi kusenzakala lokhu ngakho sekusobala ukuba impilo yami isisengozini ngakho okwamanje sengicatshile lapho engikhona ngoba akulakuthula elizweni. Ibutho libikwa lithumba abantu.”
Elinye lamagqwetha elimele uCharles Thomas loBernard Sibanda abetheswa icala lokubulala ipholisa koBulawayo, uMnu. Lament Ngwenya, uthi balakho ukuphanyeka isicelo sesibambiso sebail eHigh Court ngoLwesihlanu ngoba idale beliyalela uThomas imvumo yokuhlawulela isibambiso bethi ulecala lokuzama ukugenqula uhulumende okhethiweyo.
“Sizakuyaphanyeka amaphepha ebail akaThomas kusasa ngoba inkundla ibisithi ulecala letreason ekucubunguleni kwethu sithole ukuba akalacala elinjalo ngakho kusasa siya eHigh Court ukuyaphanyeka amaphepha ethu.”
UThomas loSibanda kuthiwa ngeviki edluleyo ngelanga lokutshengisela emzini weNjube koBulawayo bahlasele ngamatshe umufi obelipholisa, uEkson Maune, walimala kakubi, wathwalelwa esibhedlela seUnited Bulawayo Hospitals lapho afike wabhubhela khona ngelanga elilandelayo.
