Umphathintambo kahulumende owezemfundo, uMnu. Cain Mathema, uthi izikolo kazisoze zivalwe eZimbabwe loba sokuqhamuke umkhuhlane weCOVID-19 kwezinye ezabelweni ezitshiyeneyo.
UMathema utshele umsakazo weStudio 7 ukuthi izikolo lokhu zivulwe okusemthethweni kulandela ukubalwa kwazo ngoMbimbitho lonyaka kusenzelwa ukunqabela ukumemetheka komkhuhlane weCOVID-19
“Izikolo zivuliwe. Lifuna ngikhulume ngento engekhoyo. Izikolo zivuliwe.”
Kulabanye abantu abachothoza okwenziwa nguhulumende abathi kumele zivalwe izikolo ngoba usumemetheka okwethusayo umkhuhlane ezikolo eigoqela iJohn Tallach High School, Matobo Mission, Waddilove High School, Goromonzi Secondady School, Anderson High School lezinye.
Abazali lababilisi bathi izikolo kumele zivalwe ngoba kusobala ukuba uhulumende ubengalungelanga ngokweneleyo ukumelana lomkhuhlane weCOVID-19 kanye lokuvikela abafundi, abablisi lezisebenzi zezikolweni.
Izikolo eZimbabwe ezavalwa ngoMbimbitho ngesikhathi ilizwe libeka iziqondiso zelockdown ngendlela yokuvikela umkhuhlane we COVID-19, ziqale ukuvulwa ngamahlandla amathathu.
Inhlolisiso enziwe yiStudio 7 eHarare iveze ukuba isimo kasimanga kahle ezikolo.
Ummeli wesabelo seMatebeland South edale lephalamende, uNkosazana Sipho Ndlovu-Mukoni, ngomunye othi kumele izikolo ziyavalwe.
“Izikolo kazivalwe kusadingisiswa ukuthi kungeziwani ukuba umkhuhlane lo ungamemetheki ezikolo. Sibonile izikolo ezinengi ziphanjaniswa yiCoronavirus ezifana leMtshabezi lezinye. Kaziqale zivalwe izikolo ngoba siyesabela impilo zabantwana engozini.”
UNkosikazi Naledi Phiri, umbalisi emzini weKuwadzana, uthi izikolo kazilamfanelo yokulwisana lomkhuhlane weCOVID-19, okuqalisela vele ekusweleni amanzi nje wokugeza izandla.