Sokulokukhathazeka kwabanengi abadabuka eZimbabwe ngemva kokuqhamuka kolunye uhlobo lweCOVID-19 kwele Botswana, besithi ithemba lokuya ekhaya ngekhefu lekhisimusi liya lifiphala.
EleBotswana ngelinye lamazwe amathathu elilabantu abatholakale belohlobo olutsha lweCOVID-19 olubizwa ngokuthi B.1.1.529, kuyonale iviki.
Kulabanye njalo abantu abatholakale belomhlobo lo wegcikwane kwele South Africa laseHong Kong osekutshiye inengi lidangele ikakhulu ngesikhathi besekulethemba lokuthi ubukhali beCOVID-19 besebuthundubala.
Abanye abeZimbabwe kwele Botswana kade bekhangelele ukuthi ikhefu leKhisimusi lalonyaka bazakwenelisa ukuyahlangana lezihlobo labangane ekhaya, njengoba nyakeney bengenilisanga.
Kodwa ukuqhamuka kumkhakha umutsha weCOVID-19 kuyonale iviki sekuthundubeze amathemba awenengi emazweni afana leBotswana kanye leSouth Africa.
Kukhangelelwe ukuthi inkokheli yamazwe womabili ibike ukuthi kuyathathwa nyathela bani kusiya phambili.
Umsekeli kamongameli weBotswana, uMnu. Slumber Tsogwane, uthi abantu kumele behlale beqhaphele kulandela ukuqhamuka komhlobo omutsha weCOVID-19.
uTsogwane uthi eleBotswana lilakho ukubuyela kuziqondiso eziqinisiweyo zokulwisana leCOVID-19. Kodwa uthi bazalinda uphenyo oluyenziwayo phezu kohlobo olutsha lolu.
Kodwa lokhu sekufake abeZimbabwe evalweni besithi uma kubuyiselwa iziqondiso ezilukhuni zokulwisana leCOVID-19, kungatsho ikhefu lekhisimusi elimnyama.
UMnu. Ntokozo Thebe, ohlala eGaborone, uthi sebesevalweni ngesikhathi bekhangela ukuthi uhlobo olutsha luqhela ngesiqubu esingakanani.
“Besikhangele ukuthi kuyathembisa lonyaka, kungcono kulomnyaka odluleyo. Kodwa sokungathi kuzafakwa imigoqo, okokuthi singacina sisehluleka ukuhamba sisiya ekhaya.”
Kukanti uMnu. Dumezweni Ncube ukhala ngokuthi kungavalwa imngcele kuhle kutshabalalise amathemba okuya ekhaya.
“Lokhu sekulethe ukwethuka kithi ngoba besikhangelele ukuyabona abazali ngekhefu elizayo. Siyesabela ukuthi ziyeza iziqondiso. Asikukhangeleleyo yikuthi kungavalwa imngcele ngoba silesikhathi singaboni izihlobo.”
Enika isimo sokubhaha komkhuhlane weCOVID-19 ngoLwesine, usikwicamfundo Mosepele Mosepele wekhomithi yeCOVID-19 kwele Botswana, uthe isimo asikayesabeki kangako, noma nje umhlobo omutsha wabanjwa kweleBotswana ngoMvulo.
Uthi inani alikaqongi kangako, eleBotswana lingene eyinye iviki lingabhalisanga muntu obulewe ngumkhuhlane weCOVID-19.
“Bekulenani labantu abangamatshumi ayisithupha kuphela abanjwe leCovid-19 emalangeni asanda kudlula, okuyitshengiselo ukuthi umkhuhlane uqhubeka usehla, njalo asilahlekelwanga ngumuntu ngenxa yomkhuhlane lo.”
EleBotswana lithi akumelanga abantu bahle bebambe amaphaphu kulandela ukuqhamuka komhlobo omutsha ngoba ukucubungula asebekwenzile kutshengisa ukuthi umhlobo lo ulezinye impawu ezijwayelekileyo.
Amazwe angentshonalanga afana leUnited Kingdom kanye le Italy ahle amisa izethekeli ezivela emazweni abalisa iBotswana, South Africa, Lesotho, Eswatini, Namibia, Zambia kanye leZimbabwe.
