Izizalwane zeZimbabwe sezemukele ngenjabulo exubene lokwesaba inyathelo leSouth Africa lokuyekethisa imigoqo yeCOVID-19 Lockdown ngesikhathi ingcitshi zisithi liyeza ihlandla lesithathu lokuhlasela kwalo umkhuhlane.
Inengi lezizalwane zeZimbabwe kwele South Africa zithi isimemezelo sikaMongameli Cyril Ramaphosa liviki sokuthi imigoqo yokwenqabela ukumemetheka kwecoronavirus isiyekethisiwe zindaba ezimnandi, ngoba lokhu kuzavula inhlelo zabo zokuziphilisa kanye lemisebenzi.
Ngokutsho kwesimemezelo lesi isigaba sale imigoqo sisuswe kuhlandla lesithathu saya kuhlandla lakuqala. Lokhu kulandela inhlolisiso etshengise ukuthi ukumemetheka kwalo umkhuhlane ngeviki sekwehle kusuka kubantu abangamatshumi ayisitshiyagalolunye (90,000) ngoMpalakazi kwaya kubantu abazinkulungwane ezilitshumi (10,000).
Kulokhu kuyekethiswa kwemigoqole ukwenqatshelwa kokuhamba kwabantu sekuqala phakathi kwamabili ebusuku kusiya kuhola lesine ekuseni. Imbuthano layo isivulelwe ukwemukela abantu abalikhulu (100) phakathi kwesakhiwo labangamakhulu amabili lengxenye (250) kwababuthene phandle.
Utshwala labo sebuthengiswa santando ngaphandle kuphela ngesikhathi sokwenqatshelwa kokuhamba kwabantu. Lezi zindaba ezimnandi kwabeZimbabwe ikakhulua abasebenza endaweni zokuphuza amanzamponjwanala kanye lezokudlela njengoba ukuvala masinyane bekusenza bathole imali encane.
Isizalwane seZimbabwe, uMnu. Abel Khumalo, uthi kwabanengi umangoye ubevele eselala eziko.
“Abanye ebesesingasasebenzi sekuvaliwe kumankampani ethu sesizabuyela emsebenzini. Abantu abanengi abakithi eZimbabwe basebenza kumarestaurants. So, indawo lezo besezivaliwe, so kusinikeza ithemba lokuthi labo bazokhona ukuthi basebenze bakhone ukuthumela imideni yabo ekhaya ukudla nemali.”
Kodwake ingcitshi yezempilakahle uNkosikazi Glenda Gray uthi liyeza elinye ihlandla lesithathu lokuhlasela kwalo umkhuhlane ebusika.
“Sithemba ukuthi lelihlandla lizathi liqala sesihlabe amajekiseni bonke abezempilakahle.”
Leyinto esitshiye inengi lezizalwane zeZimbabwe eziqoqela uNkosazana Gugu Ncube zihlulukelwe.
“Sihambe siyesebenzela imuli zethu yebo kuzosisiza sirikhave lapho ebesi luze khona kodwake asiyaleni silokhe siqaphele ngoba icovid isasekhona. Yebo kuyangethusa njalo ukuba manje siya esikhathini somqando and amacases akhona aba manengi. So, mina ngithi asiyaleni silokhu sigqokanini ama masks.”
Le yinto egcizelelwa njalo nguMnu. Abel Khumalo ngemva kokuthi ingcitshi zithi sekungenzeka futhi kuqhamuke olunye uhlobo lwecoronavirus olwehlula la amajekiseni asekhona.
“I wave three leyi isitshayisa ngovalo ngoba kutsho ukuthi zizobuyela futhi kuma lockdown siphinde sibuyele futhi kubo level 3. So, kutsho ukuthi kunzima. Sizobhekana lakho ma sekufikile. Engingakuxwayisanje yikuthi siqhubekeni sizigcinile ukuze siphephe kulesisifo.
Isikhulumeli sebandla leThe Patriotic Front, uMnu. Mxolisi Ncube, uthi lesi akusiso sikhathi sokukhumula amabhatshi ikakhulu nxa kukhangelwa ukuthi inengi labantu alikahlatshwa amajekiseni okuzivikela.
“Asizibambeni sekeleni ukungenangena. Izibhedlela ngeke zisiphathe ngendlela eziphatha ngayo abanye abantu njengoba vele sesizwile ukuthi kulabantu abakhalakhalayo ngokuthi ukuya esibhedlela vele yikuyakufa khona. Asiyekeleni futhi njalo ukuhamba hamba sicrosa iborder sisiya ekhaya kumbe sisiza ngapha eSouth Africa ngendlela ezingayisizo, ukuthenga amaphepha okuthi umuntu usetestile yena engatestanga ngoba ekugcizeneni kufanele okwakuqala ubezazi ukuthi wena awulawo yini lo umkhuhlane njalo uvikele obathandayo.”
Okwakhathesi eleSouth Africa selilabantu abedlula isigidi lengxenye (over 1.5 million) asebehlaselwe yicoronavirus. Sebekunkulungwane ezingamatshumi amahlanu (50,000) asebefile. Ehlelweni lokuhlatshwa amajekiseni okuvikela lo umkhuhlane sebesiyafika amatshumi ayisitshiyagalombili (80,000) abezempilakahle asebehlatshiwe.