Uyamemetheka umkhakha omutsha owegciwane leCOVID-19 eZimbabwe obizwa ngokuthi yiOmicron.
Uhulumende uthi kumele abantu bezivikela ekuthapheni igciwane leli ngokulandela iziqondiso ezethulwa yinhlanganiso yezempilakahle eyeWorld Health Organization.
Umsekeli kamphathintambo wezempilakahle, uDokotela John Mangwiro, uthi abantu kumele beqaphele umkhakha weOmicron omemetheka ngamandla elizweni.
UMangwiro wethule lokhu ngesikhathi uhlangothi lwezempilakahle lubika ukuba kulomuntu oyedwa obulewe ngumkhuhlane weCOVID-19 izolo eZimbabwe kwathi abedlula inkulungwane – 1,082 bahlolwe batholakala belegciwane leCoronavirus. UMnu. Michael Sibanda ohlala eZhombe, ngomunye wabasanda kuhlaselwa ligciwane leCOVID-19.
“Ithe iqala ngicabanga ukuba yi-flue. Ngezwa sengitshiselwa ngaswela lokuthi ngenze njani, ingithwalisie nzima, lokubala akubaleki, angenelisi ukwenza umsebenzi.”
Umkhuhlane lo usuphazamise abantu abanengi abagoqela uMnu. Mike Dungeni, odabuka esigabeni sako Gwesela eZhombe.
“Lisiphazamisa ukusebenza. Abantu bayagula. Ngabe uhulumende uyanceda ukuba umkhuhlane lo ungasabalali.”
Kulabanye abahlutshwa yisinqumo sikahulumende kaMongameli Emmerson Mnangagwa othi abavela kwamanye amazwe kumele bahlale isikhatshana bevalelwe ezihonqweni ezibizwa ngeSilungu ngokuthi ngama quarantine centers ukwenzela ukuba bengamemethekisi igciwane leCOVID-19. Omunye wabahlutshwa yisinqumo lesi nguNkosikazi Melody Chigumbu, isakhamuzi seHarare.
“Asazi ukuthi sizaphila njani, kuzakuba nzima ukuba izethekeli zethu zibuye kuleli. Abantu abanengi sebeyadlelwa isikhathi sabo bese ma quarantine.”
Lokhu kuselwe nguDungeni, obekhangelele ukwethekelela eZimbabwe ngesikhathi sekhefu leKhisimusi.
“Isiphazamise kakhulu. Besifuna ukubuya ekhaya, kodwa lumkhakha ususivimbele ngoba kuzakuba nzima ukuba sihambe ekhaya.”
Uhlangothi lwezempilakahle lubika ukuba kulabantu abafika phose izigidi ezine – 3.9 million asebehlatshwe ijekiseni yakuqala yokuzivikela kugciwane leCOVID-19 kuthi njalo abafika phose izigidi ezintathu – 2.9 million sebehlatshwe eyesibili.