Kulabantu abafika phose amatshumi amabili - 17 ababulewe ngumkhuhlane weCOVID-19 izolo eZimbabwe kwathi abedlula amakhulu ayisikhombisa - 772 batholakala belegciwane leCoronavirus.
Lokhu kwenzakala ngesikhathi umsekeli kamongameli, uMnu. Constantino Chiwenga, ophethe njalo uhlangothi lukahulumende olwezempilakahle, ephika imibiko ethi izibhedlela elizweni sezigcwele izigulane. UChiwenga wethule umbiko lo esithi kulabantu abalobe amanga ngokwenzakala ezibhedlela elizweni.
Kusukela ngoMbimbitho nyakenye, abantu abahlolwa luhlangothi lwezempilakahle batholakala bele COVID-19 sebefika phose inkulungwane ezingamatshumi amathathu- 26,881.
Uhlangothi lolu luthi kunani leli, sokwabhubha abafika amakhulu ayisikhombisa - 683 kwaphepha abedlula inkulungwane ezilitshumi lanhlanu lengxenye - 15,872. Okwamanje eleZimbabwe selilamaviki amabili liphansi kohlelo lokuvalela uzulu ezindlini olweCOVID-19 lockdown kusenzelwa ukuvimba ukumemetheka komkhuhlane weCoronavirus.
Bayakhala osomabhizimusi ngokudinga incwadi zikuqhuba amabhizimusi. Bathi incwadi lezi zitholakala eHarare.
Sixoxe lomunye wabosomabhizimusi, uMnu. Tavengwa Zidya, osehlala kunkampani yakhe emelele incwadi yokuthi avule ibhizimusi lakhe koBulawayo.