Abantu abanengi eZimbabwe bathi ubathwalise nzima umkhuhlane weCOVID-19 obulele abafika phose amakhulu amahlanu – 485 kusukela ngeSonto ngeviki ephelileyo. Kulabantu abanengi asebelahlekelwe yimisebenzi eZimbabwe ngenxa yomkhuhlane weCOVID-19, okwenza kubenzima ukuba balandele iziqondiso zemithetho yokunqabela ukumemetheka kwegciwane leCoronavirus.
Uhlangothi lwezempilakahle lubika ukuba koBulawayo izolo kubanjwe abantu abangamatshumi ayisithupha lane – 64 belomkhuhlane lo kwabhubha abahlanu. Luthi kusukela nyakenye umkhuhlane weCOVID-19 waqhamukayo koBulawayo, sekwabanjwa abantu abedlula inkulungwane ezilitshumi lanye – 11,256, kwabhubha abedlula amakhulu amahlanu - 543. Umemetheka ngamandla umkhuhlane lo lemaphandleni.
Omunye ohlolwe watholakala elomkhuhlane lo nguMnu. Sibangilizwe Siziba, ohlala eNkankezi.
“Ngike ngagula umkhuhlane weCovid. Uyabe uhlaselwe yi flue enkulu, kuyaqala ikhanda kuye ngokuya kwesikhathi uyabe ungasafuni ukudla. Isifuba sibe buhlungu uvaleke, ngokuvaleka kwesifuba lokungadli umzimba uyaqinelwa ngumkhuhlane lowu. Then ngikuswelakala komoya i- oxygen emzimbeni, kuyenza umuntu ekhanye engasela mandla ngokuhamba kwesikhathi ungananzelela ukuthi kungaba ungabe ule Covid-19 suqala ukwesaba ukufa. Khonokhu ukwesaba ukufa kuba ngumkhuhlane okwenza ucine usukhulelwe ngumkhuhlane.”
UMnu. Rodwell Gumede, laye utholakale elegciwane leCOVID-19.“Ngi-tester kuthange so ngisendlini for the next coming 8 days, ngithemba ukuthi kuyabe sokusharp ngoba ziyabuya okulapha esifubeni ngathi umuntu ufake i50kg yenhlabathi esifubeni sakho ethi phefumula, ingihlasele lento leyi siyangibuyela.”
Umqondisi wenhlanganiso yeBulawayo Vendor Traders, uMnu. Mike Ndiweni, uthi abantu abadala bahlukuluzwa yimigoqo ekhona eyokungabuthani ezimfeni.
“Kulobunzima kakhulu ngoba abadala besebejwayele ukuyavalelisa abangane babo loba abantu abangena labo ensontweni uma sebebuye basitshiya, abantu abanengi bakhathazekile bahluphezekile kakhulu kodwa akulanto esingayenza ngoba ngumkhuhlane okhona osubhahile emhlabeni jikelele, yimzamo mo yokuthi kwehliswe ukumemetheka kwawo, kodwake kunjalo kuyadingenga ukuthi kubelenhlelo ezibakhona ezincedisa abantu lapho esithi yi mental health ukuthi benelise ukuthi babhekane lobunzima lobu, yikho okusilayo khathesi umuntu lomuntu usezibonela kungaba lenhlelo ezikhona ezixoxa labantu zibancedisa ukuthi hayi bantu banini lethemba kuyatholakala lokhu kuyenzakala ngani yikho okufunakalayo khathesi lokudingakalayo.”
UMnu. Effort Ncube, ohlala koBulawayo, uthi abantu beyisa ubhubhane lweCOVID-19 uma bengakaze bahlangane lalo emulini.
“Igcikwane leCorona kulula ukuthi ulithathe kancane nxa ulizwela komakhelwane kumbe ubona ku television, kodwa lingangena ngekhaya , lingene ezihlobeni, lingene kubangane lakulabo ophilalabo liyatshintsha indlela obona ngakhona, ocabanga ngakhona. Mina ngingomunye oselahlekelwe ngabangane osewangenelwa ligcikwane ngekhaya lahlasela abafowethu lahlasela abantwana ngakhoke ngikubonile ukunakekela umuntu olegcikwane okumbona umuntu esethwala nzima ukuphefumula ubona ukuthi umuntu engedlula emhlabeni loba yinini.
USikhwicamfundo Solwayo Ngwenya, umqondisi wesibhedlela seMpilo, ukhuthaza uzulu ukuthi angeyisi ubhubhane lweCOVID-19.
“Lelibhubhane leCorona virus akusiyonto yokudlala le, into le ifanana lefreza eyabonwa ngobaba kudala, ifreza yabulala abantu abanengi kakhulu njalo lolubhubhane lwe Covid-19 kukhanya lapha emhlabeni luzobhidliza imphefumulo eminengi kakhulu njalo lokhu esikubonayo yikuqala kwendaba embi ebuyayo yikho abantu bayaxwayiswa bakithi ukuthi bazinanzelele njoba siphakathi kodubo olunje.”
Kuphela usuku lwayizolo,ugatsha olubona ngezempilakahle lukhiphe umbiko oveza ukuba ababanjwe umkhuhlane weCOVID-19 izolo bedlula inkulungwane lamakhulu amathathu lamatshumi 1,370, kwabhubha abantu abangamatshumi amane lambili - 42. Kuthi abahlabe ijekiseni yokuqala epha umzimba amasotsha okumelana lomkhuhlane weCOVID-19 bayisigidi lenkulungwane eziphosa zibe ngamakhulu ayisikhombisa – 1,645,599. Asebehlatshwe ngokugcweleyo bedlula inkulungwane ezingamakhulu ayisikhombisa lengxenye – 767,910.
