UZororo Makamba, indodana kasomabhizimusi odumileyo, uMnu. James Makamba usebulewe yiCoronavirus COVID-19.
Umphathintambo wezempilakahle, uDokotela Obadiah Moyo, utshele intathelizindaba eHarare ukuthi uZororo ubhubhele esibhedlela seWilkins Hospital eHarare lapho ayehanjiswe khona kulandela ukuhlolwa kwegazi lakhe okwaveza ukuthi ulomkhuhlane lo.
Ubengumuntu wesibili eZimbabwe ukuba lomkhuhlane lo kulandela ukugula komunye ohlala eVictoria Falls.
Uhulumende uthi umuyi wake wethekelela eNew York lapho okulabantu abanengi ababanjwe yiCoronavirus.
Unobhala wezempilakahle kubandlaleMDC elikhokhelwa nguNelson Chamisa, uDokotela Henry Madzorera, uthi sokumele ilizwe lonke libambane ukwenzela ukulwisana lomkhuhlane lo.
Isiphathamandla sogatsha lwezokwethulwa kwemibiko kuZanu-PF, uMnu. Tafadzwa Mugwadi, uthi ibandla leli likhuthaza uhulumende ukuthi avale imigcele ukwenzela ukuvimba ukumemetheka komkhuhlane lo osubulele abantu abanengi emhlabeni wonke jikelele.
ICoronavirus yaqhamuke kwele China nyakenye.