Idolobho lakoBulawayo selilabantu abedlula ikhulu lengxenye -154, asebetholakale belegciwane leCOVID-19.
NgoLwesithathu kuphela, kubanjwe abantu abangamatshumi amahlanu lanye – 51, okulinani eliphezulu ukwedlula zonke izabelo eZimbabwe.
Inengi lalaba bantu ngabatholakala ebantwini abangazake baphume elizweni okwehlukene lalokho obekuphuma phambilini ukuthi inani elikhulu liyabe kuyilabo abaphindele ekhaya bevela emazweni angomakhelwane.
Abantu abangamatshumi amabili lanhlanu - 25 balabo ababanjwe bele COVID-19, sebesilile kuthi abalikhulu lamatshumi amabili lanhlanu -125 lokhe begula njalo abane sebelahlakelwe yimphefumulo ngenxa yomkhuhlane lo koBulawayo kuphela.
Ukukhuphuka kwenani labantu abagulayo lokhu kwethusa uzulu elizweni lonke kanye lemhlabeni wonke jikelele okulabantu abedlula izigidi ezedlula itshumi – 12 milllion, asebebanjwe ngumkhuhlane lo.
UDokotela Mthabisi Bhebhe wakoBulawayo uthi ukukhuphuka kwenani labantu abagulayo kuveza ukungazilungiseleli kukahulumende esithi labantu abavela kwamanye amazwe bayabaleka besamukelwa yimuli zabo.
Kulabongi ezibhedlela zeMpilo leseUBH ababanjwe ngumkhuhlane weCOVID-19.
Umqondisi wesibhedlela seUBH, uMnu. Narcissus Dzvanga, utshele iphephandaba leChronicle ukuthi kulabongi abalitshumi lasitshiyagalombili -18 ababanjwe yilumkhuhlane ngemva kokuhlangana lesigulane esibhedlela. EMpilo abongi abalitshumi lane - 14 babanjwe lumkhuhlane. Ngalokho, abongi bathi abajabuleli isiphatho abasitholayo nxa sebebanjwe umkhuhlane, bethi indawo abahlaliswa kuyo ayilunganga.
UNkosikazi Primrose Sibanda, ongumongikazi eMpilo, uthi isiphatho sabanye babo asijabulisi.
Kusenjalo, isibhedlela seMpilo sike savala iward yeCasualty ngoLwesine ekuseni kufafazwa imithi evikela ukumemetheka komkhuhlane weCOVID-19.
Umqondisi esibhdlela lesi, uDokotela Solwayo Ngwenya, uthe lokhu kwenziwa isikhathi sonke ukuthi kuvikelwe ukumemetheka komkhuhlane.
Unkosikazi Nozithelo Dube, obesesibhedla seMpilo, uthi bake bamiswa phandle okwenze ukuthi engatholi usizo abeludinga.
Eloba enkundleni yeTwitter ngoLwesithathu, umabhalani omkhulu kugatsha lokwethulwa kwemibiko, uMnu. Nick Mangwana, uthe ukukhuphuka kwenani labantu abagulayo koBulawayo leHarare kutsho ukuthi kumele kuthathwe amanyathelo okuvala izabelo lezi zombili.
NgoLwesibili, kubanjwe abantu abangamatshumi amathathu lane - 34 abatholakale belomkhumhlane weCOVID-19 bengazange baphume phandle kwelizwe.
Ilizwe leZimbabwe liyaqala ukuthola inani elikhuphuke kangako elabantu abathola umkhuhlane bengazange baphume eZimbabwe.