Lokhu likhuphuka inani labantu abatholakala belomkhuhlane weCoronavirus COVID-19. Uhlangothi lukahulumende olubona ngezempilakahle luthi inengi yalabo abatholakala belokhuhlane lo ngabadabuka kwele Zimbabwe abevela kwemanye amazwe.
Uhlangothi lolu luthi okwamanje sokulabantu abedlula amakhulu amahlanu lamatshumi ayisithupha – 567 abahlolwa batholakala belomkhuhlane weCOVID-19.
Phakathi kwenani leli, sokwabhubhe abayisithupha kwathi abafika phose ikhulu lamatshumi amahlanu – 142 basila.
Uhulumende uthi usehlole abantu abedlula inkulungwane ezingamatshumi ayisithupha – 66,238.
Uyamemetheka okumangalisayo umkhuhlane lo emazweni atshiyeneyo.
Isibhedlela seJohns Hokpkins University sithi sebesedlula izigidi ezilitshumi – 10 million asebetholakale belomkhuhlane weCOVID-19. Sebefika phose inkulungwane ezingamakhulu amahlanu – 499,342 asebebulewe yiCoronavirus.
Kwele Melika sebesedlula izigidi ezimbili abatholakale belomkhuhlane weCOVID-19. Abedlula inkulungwane ezingamatshumi amabili – 125,535 sebabhubha.
Ukuze sihlaziya ukumemetheka lokunqabela umkhuhlane lo eZimbabwe, sixoxe loDokotela Xolani Ndlovu, osebenza esibhedlela seMpilo Hospital koBulawayo. UDokotela Ndlovu, okhulume lomsakazo lo ezimele, uthi kuqakathekile ukuthi abantu bahlale behlambulukile sonke isikhathi.
