Kulezizalwane zeZimbabwe ezedlula izinkulungwane ezimbili esezicele ukususwa kwele South Africa zibuyiselwe ekhaya kulandela ukuqhubeka kohlelo lokuvalelwa ezindlini ngenxa yecoronavirus.
Isigodlo seZimbabwe kwele South Africa sithi loluhlelo luzaqala ngoLwesithathu.
Ngokutsho kombiko owethulwe yiConsulate yeZimbabwe obhekiswe kuzizalwane zeZimbabwe kwele South Africa, kulabantu abedlula izinkulungwane ezimbili – 2,191 abafisa ukubuyela ekhaya.
Inengi lalaba bantu lithi selibulawa yindlala njengoba sekwedlule inyanga egcweleyo bevalelwe ezindlini ngenxa yecoronvirus.
IConsulate ithi isiyenze isivumelwano lenkampani yamabhasi eyeEagle Liner le-Intercity Express ukuthi zithwale labo abalemali. Amabhasi akuqala azasukela eJohannesburg Park Station lePretoria.
Umuntu ngamunye ofuna ukuhamba kuzafuze ahlawule iR600 kulamankampani esebenzisa uhlelo lwebulenjini be internet olwe Computicket Travel. Ophethe imithwalo uzayibhadalela ebhasini leyo mithwalo.
Omela abadabuka eZimbabwe abangaboniyo, uNkosazana Sibonginkosi Nyoni, uthi inengi labo kabala mali yokugada amabhasi la.
“Asiselamali asisela kudla. Yonke into isiphelile manje. Ukuthi sithole leyo mali eyokuthi sihambe ekhaya asisakwanisi. So, besesicela uncedo kini ukuthi abakwanisayo ukuba basisize sibuyele emakhaya. Sesifisa ukuthi siyehlala lezimuli zethu njengoba lapha kungasahlaleki ngcono sibuyele emakhaya.”
Wonke ohambayo kuzafuze aphathe iphasipoti yakhe kanti ongelayo kufanele athintathe leConsulate.
Labo abafuna ukuhamba ngezabo izimota kuzafuze babhalise eConsulate ukuze baphiwe imvumo yokuyaphuma emngceleni.
IConsulate ikugcizelele ukuthi ekufikeni eZimbabwe bonke laba ababuyela ekhaya bazakuyagcinwa endaweni zikahulumende okwamaviki amathathu kuhlolwa ukuthi abalalo yini igciwane lecoronavirus.
Umkhokheli wenhlanganiso yeAsakhaneni Health and Wellness, uMnu. Stanley Ndlovu, uthi kufanele uhulumende akunanzelele ukuthi okwenze laba bantu bakhetha ukubuyela ekhaya yikuthi sebephelelwe yimali.
“Kunzima ukuthi umuntu ayireyize iR600 mhlawumbe abanye balabantwana 3-3 ukuthi usehamba labantwabakhe ekhaya. Uzoyithathaphi imali engako ngoba inyanga yonkeleyi bebengasebenzi abantu bebehleli ezindlini? Ngabe kuyayenzanje igovernment iprovayide itransport ibathwale mahara abantu.”
IConsulate ithi kulezizalwane zeZimbabwe ezedlula izinkulungwane ezintathu – 3,640 esezicele uncedo lokudla, okuyinto osekuzanywa ukuthi bayidingelwe kunhlanganiso ezisiza ngokudla kwele South Africa.
Ilunga leZapu, uMnu. Carnicious Nkala, uthi indlala esisezindlini ivele isisesabisa.
“Indlala yona ikhona ebantwini emaflathini lasezindaweni kodwake kulento eyodwa engiyicela kuzizalwane zakithi zaseZimbabwe zonke.Ngicela sibambaneni ngicela sisizaneni. Olohlupho khala kwabanye. Asicuphelaneni impuphu sicuphelaneni isawudo sisizaneni.”
Kusenjalo iwofisi yomeli weZimbabwe ithi labo abafuna ukubuyela ekhaya abangakabhalise ithuba lisasekhona.
