Uhlangothi lukahulumende olubona ngemihloliso olweZimbabwe Schools Examinations Council luthi kuqakathekile ukuthi kudluliselwe phambili ukulotshwa kwemihloliso obekumele ilotshwe ngoNhlangula.
Uhlangothi lolu luthi kuzadluliswa ngamaviki amane ukulotshwa kwemihloliso ngoba akukacaci ukuba luzagqitshwa nini uhlelo lokuvalela abantu ezindlini osoluphazamise ukuhlela lokulotshwa kwemihloliso. Lokhu kuvezwe encwadini ebilotshwe luhlangothi lolu ebiqondiswe kubaphathi bezikolo ezabelweni ezitshiyeneyo. Luthi umkhuhlane weCoronavirus uphazamise okumele kwenziwa kodwa konke lokhu akusoze kumise ukulotshwa kwemihlolisi.
Lokhu sokuthakazelelwa ngababalisi labazali abanengi. Omunye othakazelela lokhu nguNomthandazo Mlilo, ofunda koBulawayo.
Umzali ohlala koBulawayo, uNkosikazi Faith Nleya, uthi abantwana bakhangelelwe ukuthi bazathola isikhatshana sokuzilolongela imihloliso le loba bengafundiswa ngokupheleleyo ngababalisi.
“Ukususwa kwemihloliso kaNhlangula ihanjiswe kancane nje ngamaviki amane kuhle kakhulu, ngoba kunikeza abantwana abakade bezilungiselela eyinye njalo inyanga yokuthi babambisise belungiselela imihloliso. Loba nje bengela babalisi besezindlini, akufani lokuthi nje bavule khathesi bagijimele ukuthi babhale imihloliso bengazilungiselelanga. Kungenzeka ukuthi izikolo zivulwe bengakabhali bathole futhi isikhatshanana lababalisi babo njalo ngomkhuhlane lo okhona lokhu kuzavikela abantwana, abazali kanye lababalisi.”
Kulabanye abathi isimo esilethwe ngumkhuhlane weCoronavirus sifake abafundi enkingeni. Omunye wabalombono lo nguMnu. Thembakuye Moyo, okunhlanganiso yeAmalgamated Rural Teachers Union of Zimbabwe.
“Okubuhlungu kukibo abantwana singakhangela indlela Icovid-19 efike ngayo, ilockdown eyenzakale ngayo lokuvalwa kwezikolo. Sibone kuvalwa izikolo kungakalungiselelwa okutsho ukuthi labo abantwana bevala izikolo bekungela qhinga elithethweyo elokubancedisa ukuba balungiselele imihloliso. Kodwa-ke umhloliso awulungiselelwa mzwana ubhala, sikhangelele ukuthi lapha abakhona ku-lockdown bayafunda benza izinto ezinengi. Thina njenge ARTUZ sizamile ukuncedisa abantwana ngokubanikeza ama free online lessons aka Grade 7, Form 4 le Advanced Level.”
UNkosikazi Sukoluhle Ndlovu, okunhlanganiso le, uthi kumele uhulumende athathe amanyathelo afaneleyo ukuze abantwana balobe kahle imihloliso.
“Sithanda ukuthi nxa sekusiya lungiselelwa ukubhala kwemihloliso abantwana abazabhala kanye lababalisi abazabe bekhangele ukuqhutshwa kwemihloliso leyi bebe bevikelekile kumkhuhlane weCOVID-19. So, besikhangele ukuthi abantwana ba tester, banikwe impahla ezifaneleyo ezingabavikela ekuthatheni umkhuhlane lowu oweCOVID njalo indawo abazabhalela kizo zibe zihlanziwe, zikhangelwa mihla ngemihla ukuthi zilungile njalo azisoke zimemethekise umkhuhlane.”
Isikhulumi senhlanganiso yababalisi eyeZimbabwe National Educators’ Union, uMnu. Blessing Manda, uthi ngumbono omuhle owokuthi kuqhubekiselwe phambili ukulotshwa kwemihloliso njengoba abantu besesaba ukuthelelana umkhuhlane weCOVID-19.
“Kuliqophelo elihle uma sikhangele isimo segciwane umhlaba wonke jikelele. Njengelizwe lethu asilawo amandla okumela laleli igcikwane ikakhulu ezikolo. Izindlu zokufundela abafundi zincane kakhulu, kwesinye isikhathi abafundi bayedlula amatshumi ayisikhombisa. Izikolo zethu azila mpahla ezeneleyo ezokufunda okwenza kube nzima ukuthenga impahla zokuvikela igcikwane le Corona ukuze kuqhutshwe imihloliso.
UNkosikazi Nicky Moyo, isikhulumeli seZimbabwe Schools Examinations Council, walile ukukhuluma ngodaba lolu esithi incwadi eveza udluliselwa phambili kwemihloliso okumele ilotshwe ngoNhlangula ibiqondiswe kubaphathi bezikolo hatshi uzulu.
