Izakhamizi zakoBulawayo zithi zikhathele ngokuswelakala kwemali, ukukhuphuka mahlayana kwentengo yempahla ezitolo lokunye okubenza bedane okumangalisayo ngesikhathi sekhefu leKhisimusi lonyaka.
Abantu abanengi bathi ukwehluleka ukuthola imali emabhanga laleyo ethunyezwa yizihlobo ezihlala kwamanye amazwe, kubephula inhliziyo ngoba bebefisa ukudla izibiliboco njengalokhu ababekwenza kudala ngesikhathi sekhefu leKhisimusi.
Bathi okwamanje bazehluleka lokuthambisa imphimbo yabo ngamanamunede lokudla amakhekhe lerayisi ngoba konke lokhu akusathengeki ezitolo okukhuphulwa khona intengo yempahla mahlayana ngosomabhizimusi.
Umsakazo weStudio 7 uxoxe labanye abantu edolobheni leli abakhanye behlulukelwe ngokuswelakala kwemali, ukukhuphuka kwentengo yempahla njalo lenhlawulo yamabhasi athwala abaya emaphandleni.
UNkosisikazi Doreen Sibanda, obesesilwindweni samabhasi eRenkini Country Bus Terminus osebenzela eBostwana, uthi iKhisimusi uyilungiselele loba sisibi kakhulu isimo somnotho eZimbabwe.
UMnu. Meluleki Mlilo, okubhizimusi lokufuqa ingqola eRenkini, uthi ibhizimusi yakhe ayikhombisi ukuthi kulekhefu leKhisimusi.
UNtando Magijima, osebenzela eBoswana olubhekise eKezi, ukhala ngokukhuphulwa kwentengo yempahla etshiyeneyo.
Abantu abanengi bayehluleka ukuhlawula imali efunwa ngabanikazi bamabhasi athwala uzulu ofisa ukuya emaphandleni. UMnu. Thandanani Mpofu, osebenza njengomncedisi kamtshayeli webhasi, uthi abantu bayahamba sibili emakhaya kodwa babhadala nzima ngoba bayehluleka ukuthola imali emabhanga.
Banengi abakhala ngalokhu njalo langokwenzakala elizweni abanjengo Mnu. Ntandoyenkosi Mhlanga.
Lokhu kulendwendwe ezinde emabhanga koBulawayo lapho abanye abantu abalala khona bedinga imali yokuthenga ukudla kwekhefu leKhisimusi. Abathunyezelwe imali ngabahlala kwamanye amazwe kusetshenziswa iWestern Union labo babhekane lokusilela kwemali. Kodwa abanye abalayo imali babonakala bethenga impahla lokudla emavinkilini.
