Umhlangano wamalanga amabili oweForum for China-Africa Cooperation (FOCAC) uvulwe ngokusemthethweni eJohannesburg ngoLwesihlanu kwathi umongameli weChina umnumnzana Xi Jinping wahle wazisa ukuthi eleChina lizakupha amazwe eAfrica amadola angamabhiliyoni angamatshumi ayisithupha - $60 billion.
Le yinto etshayelwe ihlombe ngomongameli bamazwe eAfrica kwathi uMongameli Robert Mugabe wachaza umongameli Xi Jinping njengenceku ethunywe yiNkosi.
Inkokheli zamazwe eAfrica ezedlula amatshumi amathathu bezibuthene eJohannesburg ekuvulweni ngokusemthethweni komhlangano weFOCAC.
Inengi lalezi nkokheli bezithiye indlebe ukuzwa ukuthi ncedo bani oluze leChina lokuphathisa ezomnotho zamazwela ezingamanga kuhle.
UMongameli Xi uvele wayitshaya esikhonkosini wendlala amacebo abanzi okuphathisa izwekazi leAfrica.
Limali izasebenza kuntuthuko yezamabhizimusi, ezokulima, enhlelweni zokuqeda ubuyanga, kwezemfundo, ezempilakahle lezinye inhlelo.
UMongameli Xi ukubeke kwacaca ukuthi iChina le Africa bafuna ukuqhuba ubungane ubulenhlonipho lokulingana. Uthe njalo akekho umakhonya kulobu budlelwano kodwa iChina izancedisa iAfrica kuphela ekuhluzeni inhlupho zayo ngendlela efuna zihluzwe ngayo.
Le yinto ethokozise uMongameli Mugabe waze wathi umongameli Jinping yinceku yeNkosi ethunyelwe eAfrica.
Enkulumeni yakhe kulo umhlangano, umongameli Mugabe uncome eleChina esithi ubudlelwano bayo leAfrica ngoba ntolontolo. Ubuye wachothoza labo abathi kufanele injongo zeChina ziqatshelwe.
NgoLwesihlanu kube lombukiso wemifanekiso ekhombisa ukuphumelela komanyano weFOCAC kwabuya kwaba lomunye njalo wamankampani enza impahla asekelwa zinhlelo zeFOCAC. Kube njalo lomhlangano wabosomabhizimusi ndawonye lenkokheli zamazwe.
NgoMgqibelo inhlanganiso yamakhosikazi abomongameli izaqhuba owayo umhlangano andubana lumbuthano uvalwe ngokusemthethweni.
