Umumo edolobheni lakoBulawayo ulokhe umubi kulandela ukutshengisela lobudlwangudlwangu obebusenzakala ensukwini ezedluleyo.
Izakhamizi ezinengi zikhala ngokuswela indawo zokuthenga ukudla kanye lokunye okumbalwa ngemva kokuba izitolo ezinengi zithathelwe impahla.
Kodwa enzikini yedolobho umumo kuthe kusiyatshona ilanga usubuyela kancane endaweni yawo.
Kwezinye indawo ezinjenge Nketa Six bekulemota yesinkwa ebibhoda ithengisela abantu kodwa ikhatshwe ngamapholisa.
UNkosikazi Silenkosi Tshuma, isakhamuzi seNketa Six, uthe, “Lapha eNketa akulashop esele isebenza njalo namuhla ekuseni kulemota ebibhoda ithengisa isinkwa nge$2 iloaf eyodwa. Imota leyi ibiphelekezelwa ngamapholisa.”
Unkosikazi Nothabo Nyathi laye ohlala elokitshini leNkulumane uthi batshone behleli endlini sebeswele ukuthi baqalise ngaphi njalo abazi ukuthi bathenge ukudla ngaphi.
Uthi imitshova ibilokhe ingahambi emigwaqweni ngakho-ke abantwana besikolo abayanga ezikolo.
“Thina lapha eNkulumane lokhe sihlezi asazi ukuthi siqalisele ngaphi ngoba imitshova ilokhe ingahambi, izitolo azilalutho labantana bezikolo abayanga esikolo. Siphelelwe asazi ukuthi sibambe ngaphi lamapholisa awakatsho lutho.”
UMnu. Nkosiphile Bhebhe, ophila ngokuthengisa emigwaqweni koBulawayo, uthi izitolo ezinengi bezivuliwe ngaphandle kwako TM Hyper kodwa bekulendwendwe ezesabekayo.
“Ukubulawa kwezitolo sekusitshiye ebunzimeni ngoba khathesi sekumele sithenge edolobheni. Njalo namhla izitolo ebezivuliwe ngo TM kuphela njalo indwendwe ebezilapha bezisesabeka.”
Laloba insuku zokutshengisela ngokungayi emsebenzini okuvale amadolobho wonke elizwe bezintathu isimo besilokhe singakabuyeli kulokho ebesiyikho khona ikakhulu emalokitshini lapho amavinkili ambalwa ahlaselwe ngabantu abagqhekeze bazithathela impahla lokudla okungaphandle komthetho.
Khathesi akusanyakazeli kakhulu kodwa umumo ulokhe usesabeka ngoba abebutho lokhu bephakathi kwabantu. Izikolo, amabhanga kanye lendawo ezimbalwa bezivaliwe.
