Abaphila ngokuthenga impahla phandle kwelizwe bethengisa eZimbabwe bakhala ngokuthi impilo yabo isilukhuni ngamandla ngesikhathi imngcele ilokhe ivaliwe nomanje ukudlula kwempahla kuvunyelwa.
Abangena kwele Botswana bayahlolwa ukuthi abalagciwane leCOVID-19, okwenza ukuthi bathathe insuku besemngceleni belinde impumela. Inengi kwele Zimbabwe liphila ngokuthenga imphahla emazweni afana leBotswana leSouth Africa, besiyathengisa ekhaya.
Kodwa ngesizatho sokuqhamuka komkhuhlane owecoronavirus, iCOVID-19, abaphila ngalendlela sebethola impilo ilukhuni.
Imngcele ilokhe ivaliwe phakathi kwamazwe amanengi emhlubulweni wangezansi kwezwekazi leAfrica, okutsho abanye abanelisi ukuphuma eZimbabwe besiyathenga impahla.
UNkosikazi Soneni Dube, ohlala eGaborone ekubhizimusi lokuthenga lokuthengisa, uthi impilo isiguquke yabamunyu ngenxa yeCOVID-19.
“Silimele kakhulu. Uyathola ukuthi uma kuqala umkhuhlane weCOVID-19, akulamuntu akade ezimisele. Abanye kade silemphahla ehanjiswe ekhaya. Imngcele yavalwa kungelasixwayiso. Kunzima ngoba yiyo imali esiphila ngayo ukubhadalela abantwana imali yesikolo, lokuziphilisa.”
UMnu. Rodwell Moyo, okubhizimusi lokuthengisa imithi yenkomo kwele Botswana, uthi nomanje bevunyelwa ukungenisa impahla, imithetho okumele beyilandele ilukhuni.
“Uhlupho esilalo yikuthi kumele uhlolwe ukuthi kawulawo umkhuhlane wecoronavirus, uhlale amalanga athile ulindele impumela. Ngemva kwalokho usungavunyelwa ukungena kodwa uqhutshwa ngamapholisa kumbe ngamasotsha. Uhlupho olukhona yikuthi silahlekelwa yisikhathi sise mngceleni.
Uthi ngesikhathi besemngceleni, bengakangeni eBotswana, bacina besebenzisa imali enengi, okulimaza inzuzo okumele beyithole ngemva kokuthengisa.
“Isikhathi siyalahleka esinengi lebhizimusi iyalahleka ngesikhathi ulinde emngceleni. Okuhluphayo njalo yikuthi ucina usidla imali okumele ibe yinzuzo ngoba kumele ube lokudla okwaneleyo, ikakhulu kucele leZimbabwe ukudla kuyabe kungekho.”
UMoyo uqhubeke esithi bephindela eZimbabwe bayavalelwa endaweni ezingcina abantu abavela phandle kwelizwe, ama isolation centres.
Uthi kulovalo lokuthi bacina bevalelwe labantu abagulayo, okunge ngeza amathuba awokuthi bethole igciwane leCOVID-19.
EleBotswana lona lithi kuqakathekile ukuthi wonke umuntu ongenayo elizweni ahlolwe, kuyindlela yokwenqabela ukumemetheka komkhuhlane lo.
IBotswana ilabantu abangaphansi kwekhulu ababanjwa belomkhuhlane weCOVID-19, kodwa inengi ngabatshayeli bamaloli bokuza, asebabuyiselwa kubo.
