Inhlanganiso emela amalungelo abantu abalesimo seAutism eye Autism Organisation of Zimbabwe, eleminyaka emithathu yanikwa nguhulumende ipulazi, ithi kayenelisi ukulisebenzisa.
Lokhu kwenzakala ngesikhathi amazwe amanengi okugoqela ele Zimbabwe enanza imisebenzi yokuqakathekiswa kweAutism ekaMabasa.
Abenhlanganiso yeAutism Organization of Zimbabwe bathi imizamo yabo ngeyokukhathalela abantwana abales’isimo esivame ukubonakala kubontanga abakhulela muva kulabanye.
Umqondisi walinhlanganiso le, uNkosikazi Helen Mutambara, uthi ilizwe leZimbabwe lisalela emuva ekuqakathekiseni imizamo yokuphilisa kahle abantu abalesimo lesi.
UNkosikazi Helen Mutambara uhulumende wabaphathisa ngokubanika ipulazi eRuwa kodwa kabenelisi ukulisebenzisa.
Uthi akusaziwa ukuthi bazakwenzani ngodaba lolu ngoba umuntu ohlala kulelopulazi usehambise udaba lokulithathelwa emthethwandaba.
UNyasha Mutambara, osakhulayo oleminyaka engamatshumi amathathu ophathisa kuloludaba, uthi uhulumende ngokwakhe umele angenele ngendlela ezwayo ethathe iAutism ngokufana leCholera le HIV.
Lokhu kusekelwe nguNkosikazi Elizabethi Munikwa, ophathisa laye abantwana abalesimo lesi, othi abazali kumele befundisane labantwana babo belesineke ukuze bekhule kuhle.
Inhlanganiso ezimela abaphila le autism zithi abantwana abanje kumele befunde ezikolweni labanye hatshi ukuthi babe lezikolo zabo bodwa kumbe.
Abantu bakhuthazwa ukuba badinge ukuzwisisa ngalesisimo ngokugcweleyo ngoba ukusilela kolwazi kuphazamisa impilakahle lenhlalakahle yabalesimo lesi.
Inhlanganiso ebona ngezempilakahle emhlabeni wonke jikelele eye World Health Organisation ithi umuntu oyedwa phakathi kwabalikhulu lamatshumi ayisikhombisa emhlabeni balesimo seAutism njalo sitholakala okuphindwe kane ebantwaneni abangabafana ukwedlula amankazana.
