Kulabantu abathi kumele zesulwe izijeziso zenotho ezafakelwa inkokheli yebandla leZanu PF labanye abathi ibandla elibusayo kumele lijeziswe ngoba abalandeli balo bephula ilungelo loluntu.
Bakhuluma lokhu ngesikhathi kulungiselelwa usuku lweAnti-Sanctions Day ngoMvulo.
UMongameli Emmerson Mnangagwa ukhangelelwe ukwethula umbiko oqakathekileyo kusasa ngesikhathi kunanzwa usuku lweAnti-Sanctions Day.
Amazwe asemhlubulweni wezansi yezwekazi leAfrica akumanyano weSouthern African Development Community asekela ilizwe leZimbabwe elithi kumele zesulwe izijeziso zenotho ezafakelwa inkokheli yebandla leZanu PF ngamazwe entshonalanga.
Amazwe entshonalanga athi ibandla leli lephula ilungelo loluntu njalo lehluleka ukuqhuba ukhetho olubalulekileyo. Kukhangelelwe ukuba abalandeli bebandla leZanu PF bazatshengisela emigwaqweni besithi kumele zesulwe izijeziso zenotho.
UMnu. Washington Mlotshwa, ohlala koBulawayo, ngomunye wabantu abathi isikhathi sesiside kukhalwa ngezijeziso zenotho lezi. Uthi sekufanele ilizwe leZimbabwe lidinge ezinye indlela zokuthuthukisa umnotho.
“Indaba yama sanctions sesikhulume ngayo kakhulu, kuze kube lamuhla lokhe sikhuluma ngayo. Kufanele ukuba khathesi sibe sesilendlela ezokukhulisa umnotho wethu irregardless ukuthi kulama sanctions loba hatshi. Ngibona engathi okusibulalayo elizweni lethu yindaba ye corruption, nxa singayikhipha kusukela phezulu kuhulumende kusehla kusiya phansi izinto zonke ziyahamba kuhle. IZimbabwe lilizwe elilemali, imali yenziwa through igolide, platinum lama diamonds. Kodwa ngenxa ye corruptions asiyiboni imali le isehla isiya phansi ukuze i-benefit wonke umuntu.”
UNkosikazi Patricia Tshabalala, ilunga lenhlanganiso yezakhamuzi eyeBulawayo Progressive Residents Association, uthi ilizwe lithwaliswe nzima ngababusayo hatshi izijeziso zenotho.
“Sikhangele iAnti Sanctions Day ezakwenziwa kusasa, okubuhlungu yikuthi laloba ilanga leli lifakiwe ilizwe lethu alikwazi ukugcina abantu babo. Vele ilizwe leZimbabwe alikaze liziphathe kuhle, inkokheli zeZimbabwe zizikhangele zona yibo abathethe izinto zonke bazibuthelela kibo. Ama sanctions angezelela ubunzima ebantwini abaphansi. Laba abanye bengakhala kodwa ama sanctions awabahluphi. Ama sanctions angabe ekhona kodwa okukhulu yikuthi ilizwe lethu alihlelekanga kwezomnotho. Umnotho welizwe iphethwe ngabantu abathize phezulu.”
Lokhu kusekelwa nguMnu. Obed Bhebhe, ohlala eNketa koBulawayo.
“Izijeziso zomnotho lezi ayisizo zikazulu kodwa zikhangelane leziphathamandla zikahulumende lamankampani ambalwa kodwa ke ngenxa yokuthi uhulumende wethu ujayele ukuthi ebe ebhada omunye ngodaka kodwa kunguye osenkingeni. Yikho sithola ukuthi sesithi ama sanctions yiwo ahlasela uzulu kodwa kunguye ohlulumeza uzulu esenzela ukuthi kukhanye engani ama sanctions lawa yiwo alimaza kodwa kunguye yena ophatha kubi uzulu.”
Kodwa uMnu. Greater Sibanda, ohlala Emganwini koBulawayo, uthi izijeziso lezi zithwalise nzima abantu eZimbabwe.
“Ama sanctions abuyile njalo they’re affecting abantukazana. Laba abantu okuthiwa ukuthi kumele babe affected kabakho affected. Ama companies lawa okuthiwa adlelana le Zanu PF ngama companies aqhatshe abantu abanengi so ngalokhu ama sanctions ayinto ebuhlungu kakhulu, aluba ngabe ayakhitshwa.”
Osekela ibandla leZanu PF, uMnu. Malaki Nkomo, uthi abantu bonke eZimbabwe kumele balwisane lezijeziso zenotho lezi athi zibhidliza amabhizimusi elizweni.
UMnu. Thomas Hastings, okhangelane lenhlelo ezitshiyeneyo esigodlweni seMelika kwele Zimbabwe, ngeviki ephelileyo eHarare wenze umhlangano loNkosazana Elena Douhan, isithunywa senhlanganiso yamazwe omhlaba wonke jikelele eyeUnited Nations, ohlolisisa umonakalo odalwe yizijeziso zenotho ezafakelwa inkokheli yebandla leZanu PF.
UNkosazana Douhan ukhangelelwe ukuba uzagqiba uhambo lwakhe kwele Zimbabwe kunsukwana ezilandelayo.
