Sokulokuthula kancane edolobheni leFerguson eMissouri kwele Melika lapho ipholisa elimhlophe eladubula khona ijaha elinsundu esitaladini.
UMichael Brown wadutshulwa ngendlela esitshiye uzulu ethithibele loMongameli Barack Obama weMelika esithi kumele kuhlolisiswe ukubulawa kwakhe nguDarren Wilson.
Sokulamalanga alitshumi lanye – 11 amapholisa ahlome okumangalisayo egijimisana labantu abazondiswe yikufa kukaBrown.
Bathi ukubulawa kwakhe kutshengisa ukuthi lokhe kulenkethabetshabi emangalisayo eyenziwa ngamapholisa amhlophe okukhanya ezonda abantu abansundu.
Igqwetha elikhulu leMelika, uAttorney General Eric Holder, selithunywe nguObama ukuthi lihlolisise udaba lolu.
Kusenzakala konke lokhu, abasekela uWilson sebemdingele inkulungwane ezilikhulu lamatshumi amahlanu amadollar - $115,000. Imali le yedlula ngenkulungwane ezimbili - $2,000 leyo esidingelwe amagqhwetha kaBrown.
Uhlangothi lukahulumende weMelika olubona ngokwenzakala elizweni lakwamanye amazwe olweU.S. State Department luthi akumelanga uzulu athi okwenzakala eFerguson kunjengalokho okujayele ukwenzekala eGhibithe, eChina le Zimbabwe.
Kambe uzulu uthini ngodaba lolu eZimbabwe lapho amapholisa ayaziwa ngokugijimisa labo abalwela ezombusazwe lelungelo loluntu?
Sixoxe loMnu. Morris Ngwenya osekela ibandla leZanu PF loMnu. Kucaca Phulu igqwetha elilwela ilungelo loluntu ngodaba lolu.
UNgwenya uthi akumangalisi okwenzakala eMelika lapho okubusa umuntu onsundu ongakenelisi ukulungisa ukukhangelelana phansi phakathi kwabansundu labamhlophe.
UPhulu uthi loba uObama engumuntu onsundu akwenzakali ukuthi alungise udaba lolu njengoba ludaba lwakudala.
Uthi kuzathatha isikhathi eside ukuze kulungiswe okuhlupha abansundu labamhlophe kwele Melika lezinye lakwamanye amazwe.