Ikhomithi yedale lephalamende ebona ngezemigodi izaqala uphenyo lokubuzisisa uzulu ngodaba lwababulala abantu endaweni ezilemigodi elizweni ababizwa ngokuthi ngaMashurugwi.
Ilizwe libone ukuqonga kwezehlakalo ezinengi zabantu abahamba bethwele izikhali bethatha ngodlame igolide emigodini yabanye.
Izehlakalo lezi zikhuphuke ngomnyaka odluleyo lapho okufe abantu abambalwa abanye balimala ngenxa yokwenza kwabo Mashurugwi laba.
Idale lephalamende elibona ngezenjiwayo ngoLwesithathu lenze umhlangano lathatha inyathelo lokuba kucutshungulwe ukuba loluhlupho lungenqatshelwa njani.
Umgcinisihlalo wekhomithi le uMnu. Edmond Mkaratigwa uthi bafuna ukubona ukuthi abantu laba bavela ngaphi njalo basekelwa ngubani.
Omela iMagwegwe edale lephalamende uMnu. Anele Ndebele uthe njengekhomithi bafuna ukuba udaba lolu lulungisiswe ngokuphangisa.
Kodwa ingcwethi ezicubungula ezombusazwe zithi ukwenza uphenyo akusoze kusize lutho ngoba kusazakala ukuba aMashurugwi la abantintwa ngabomthetho okugoqela amapholisa.
