Kuhlelo lwamasiko lokuphila kwabantu nsukuzonke, lamuhla siyaqhubeka ngodaba lwamalobolo esalutshiya endleleni ngeviki ephelileyo lapho esasixoxa khona loMnu. Peter Zwide KaLanga Khumalo ingcwethi kwezamasiko esintu loNkosazana Precious Dube olwela ilungelo labesifazane.
UKhumalo loNkosazana Dube babelemibono otshiyeneyo ngokubizwa kwamalobolo. UMaDube wayesithi amalobolo kumele ahambelane lemfundo yentombazana.
Kodwa-ke uKhumalo watshaya phansi ngenduku esithi imali yamalobolo ngeyokuhlawulela ingane ezizalwa ngabatshadileyo hatshi abesifazane.Waphinda wathi abesifazane kababizi amalobolo.
Bekhuluma ngodaba lolu, inkampani yeNigeria ebizwa ngokuthi yiAnakle yayivezela uzulu okungasetshenziwa ngabantu, ikakhulu amantombazana, ukubiza amalobolo.
Okwethulwe yinkampani le kuthiwa yiBride Price App ehlolisisa infundo, isomo somzimba njalo lesandla sokupheka somuntu ekubizeni amalobolo. Inengi labantu lingene ebulenjini lahlolisisa ukuthi lokhu kusebenza njani.
Amantombazana alakho ukuzibizela amalobolo asebenzisa iBride Price App loba nje abadala bengeka bakukhangela lokhu. Imali ebizwayo lapha ngeyeNigeria eyaziwa ngokuthi ngamaNaira.
Ulakho ukuphendulela imali le ukuthi ibize amadollar eMelika. Kambe amantombazana angazibizela amalobolo na? Ngubani olotsholwayo?
