Ukubulawa kwesilwane esilodumo esasibizwa ngokuthi nguCecil eZimbabwe sokuzondise abanye abantu eZimbabwe asebesithi sokumele wonke umuntu olamapulazi amanengi athathelwe ikakhulu labo abahlala lapho okulondolozwa khona inyamazana zasendle.
Omunye wabo nguMnu. Kudakwashe Bhasikiti owayengumphathintambo wesabelo seMasvingo owaxotshwa kuhulumende kulandela umhlangano webandla leli oweCongress nyakenye.
Wacatshangelwa ukuthi wayebambisana labanye bakhe abanjengo Nkosikazi Joice Mujuru ekuzameni ukukhipha uMongameli Robert Mugabe esikhundleni.
UBhasikiti uthi inyamazana zasendle zithwele nzima emapulazini abizwa ngokuthi ngama conservancies athathelwa abamhlophe yiziphathamandla zebandla leZanu PF ezazivele zilamanye amapulazi.
Uthi konke lokhu kumele kuphela njengoba kungancedi uzulu njalo kusenza ukuthi kuzingelwe inyamazana santando.
Ukuze sihlaziye udaba lolu, uGibbs Dube weStudio 7 uxoxe loMnu. David Ndlovu, okudale leCentral Committee kubandla leZanu PF othi akulunganga okwenziwa ngabanye bakhe.
UMnu. Zifiso Masiye oweBalancing Rocks Consultacy ugcizelele esithi kumele kulandelwe imithetho ezakwenza ukuthi uzulu athole inzuza ethe xaxa ekuzingelweni kwezinyamazana.