Ibhanga leAfrican Development Bank linika ilizwe leZimbabwe izigidi ezilitshumi lengxenye zamadola - $10.5 million eyokuvuselela inhlangothi zikahulumende ezitshiyeneyo kanye ledale lephalamende.
Imali le eyethulelwe eleZimbabwe ngumholi webhanga leli, uMnu. Damoni Kitabire, ngeyokuvuselela ukusebenza kohlangothi oluthatha imithelo olwe Zimbabwe Revenue Authority, idale lephalamende kanye lolubona ngokusetshenziswa kwemali olwe Auditor General.
UKitabire uthe lokhu kuzanceda ukuthi ilizwe libuthanise kuhle imithelo kanye lokulwisana lodubo lokutshontshwa kwemali kahulumende.
“Siyathaba ukuba siyakhulisa ubudlelwano bethu ngalesisenzakalo sanamuhla lapho esipha imali engange US$10.51 million. Loba nje limali ingekho nengi, silethemba ukuba izanceda ekutholeni umthelo, ukuqinisa iphalamende logatsha lwezemali oluka Auditor General.”
Obemele iZIMRA emkhosini wokunikezwa kwaloluncedo, uNkosikazi Faith Mazani, uncome kakhulu ibhanga leli.
“Imali leyi iyasinceda ukuthi senze umsebenzi wethu owokuthatha umethelo, income leVAT lokunye njalo ukuthi abantu benelise ukubhaldala umthelo. Uncedo lolu luzakwenza kubelula ukuthi sithole imali kuzulu lakumankampani.”
Obemele unobhala wedale lephalamende, uNkosikazi Hellen Dingani, wazise ukuba limali izabasiza ukuhlolisisa umsebenzi owenziwa nguhulumende.
“Thina njengephalamende sithole $2 million. Sifuna ukuba siqale izifundo zephalamende. Amakhomithi azakube ekhangela okwenziwa nguhulumende esikuthi yi-oversight, yikho abazancedakala ngakho ngemali le.”
Ibhanga le Africa Development selilesikhathi linceda eleZimbabwe kunhlangothi ezitshiyeneyo zokuthuthukisa umnotho welizwe. Edale lephalamende kulamakothi athile azancedakala agoqela ebona ngezemigodi, ebona ngezokuhlelwa kwesikhwama selizwe eyebudget, eyepublic accounts, ebona ngezabesifazana lamabhizimusi amancane, yezokulima, yezamandla kagetsi lamanye.
