Inhlanganiso yabongi ithi abongi abalwethembi uhlelo lweSinopharm Vaccination kungakho kulabongI abangaphansi kwamakhulu amabili asebehlatshiwe.
Ikhansili yakoBulawayo ikhiphe amaqembu amane azabe encedisa ekuhlabeni ngaphansi kohlelo lweSinoPharm Vaccination. Iqembu lokuqala liyabe lisesibhedlela seMpilo kuthi elesibili lise United Bulawayo Hospital (UBH), elesithathu esibhedlela seNgutsheni njalo elinye lizabelihlaba izisebenzi ezimqoka libhoda.
UMnu. Enock Dongo, umkhokheli wenhlanganiso yabongi eyeZimbabwe Nurses Association, uthi abongi abalalwazi ngomuthi lo yikho okwenza bengafuni ukuhlatshwa.
“Akula lwazi ebantwini jikelele labezempilakahle, abezempilakahle abayibo okumele bahlabe kuqala bathi abalalwazi ngomuthi lo. Lokhu yikho okwenza ukuthi kubelabantu abalutshwane asebehlabile lakulabo abafuna ukuhlaba. Uhulumende ubethe umuntu lomuntu uyazikhethela ukuthi ahlabe kodwa kuyakhathaza ukuthi abezempilakahle okumele kube yibo okumele bavikeleke yibo abalayo.”
UMnu. Anthony Majongosi, ongumongi esibhedlela seUBH njalo omele abongi koBulawayo kunhlanganiso yeZimbabwe Nurses Association, uthi uhulumende kumele adinge indlela zokufundisa abantu ngoba balutshwane abazahlatshwa.
UNkosikazi Nomsa Ncube, isakhamuzi sakoBulawayo, uthi ngendlela abongi abala ngayo ukuhlaba kubenza labo besabe ukwamukela ukuhlatshwa.
UNkosikazi Sithokozile Hove, okhokhela uhlelo lokuhlaba ekhansilini yakoBulawayo, wenqabe ukuphendula imbuzo ethi akakakhangeli inani labantu asebehlatshiwe.
Kodwa umbiko owethulwe yinhlanganiso yabongi eyeZINA uveze ukuthi abongi abakunhlanganiso yabo asebehlatshiwe bangaphansi kwamakhulu amabili (192).