Abasebenza kwezempilakahle bathi kumele uhulumende afundise abantu ngokugcweleyo ngejekiseni yeSinopharm, eyokuvikela uzulu kumkhuhlane weCOVID-19.
Uhlangothi lwezempilakahle luthi abantu abafika phose inkulungwane ezingamatshumi amane – 36,359 sebehlatshwe ijekiseni yeSinopharm selokhu kwaqala ihlandla lakuqala lokujova abongi, odokotela labanye okuthiwa ngeSilungu ngama frontline workers. Kodwa banengi abalokhu besithi kumele uhulumende afundise uzulu ngokuqakatheka lokusebenza kwejekiseni le.
UMnu. Anthony Majongosi, umgcinisihlalo wenhlanganiso yabongi eyeZimbabwe Nurses Association esibhedlela seUnited Bulawayo Hospitals, uthi ezinye izisebenzi zempilakahle lokhe ziyithandabuza ijekiseni yeSinopharm.
“Khathesi i-government ayikakenzi izinto zokuthi ifundise abantu ngevaccine leyi ukuthi isebenza njani, ibangelani emzimbeni kumbe inceda njani abantu. Ama-health workers ayahlaba kodwa balutshwane, singazi kumbe i-number izakhwela ngokuhamba kwesikhathi abantu sebebona ukuthi abanye abahlatshiweyo bayaphila kuhle yini.”
Banengi abongi abalombono ofana loka Majongosi. Kodwa uDokotela Rodgers Magigo, omunye wabahlaba ijekiseni yeSinopharm, uthi kakaze ahlangane lomuntu othi ulezinyalo zejekiseni yeSinopharm.
“Mina kulabo esengihlangane labo abahlatshiweyo njengami angizange ngihlangane loyedwa nje obe le problem kumbe wa-reactor ngendlela engafanelanga kuSinopharm vaccine. Ngiyakhuthaza bonke abantu, amahealth workers labo bonke abantu ukuthi asihlatshweni si-vaccinater.”
UMnu. Thamusanqa Nyathi, isakhamuzi sakoBulawayo, uyaluncoma uhlelo lokuhlaba abantu ijekiseni yeSinopharm.
“Iprogram ye-vaccination inhle kakhulu. Siyafisa ukuthi nga kuyatholakala ama resources, i-medication leyi yevaccine le i-procure masinyane abantu bonke bathole ivaccine ukuze i-economy ibuyele esimeni sayo, siyabonga ukuthi uhulumende usebenze kuhle kakhulu ukuthi kutholakale ivaccine leyi. Sicabanga ukuthi ngabe leyi i-program iyafika kuye wonke umuntu masinyane.”
Idolobho lakoBulawayo labelwa amajekiseni azinkulungwane ezilitshumi lantathu lamakhulu amabili - 13,200, akhangelelwe ukuba ahlatshwe abantu abazinkulungwane eziyisithupha lamakhulu ayisithupha – 6,600. Kugqitshwa iviki ephelileyo besekuhlatshwe abantu abedlula inkulungwane ezine. Kukhangelelwe ukuba ilizwe leZimbabwe lizathola amanye amajekiseni afanayo eliwanikwe ngele China. Kusenjalo, ziyavulwa izikolo kusasa abanye abazali bekhala ngokuvikela abantwana lababalisi kumkhuhlane weCOVID-19. Omunye wabakhalayo ngalokhu nguNkosikazi Caren Mlotshwa.
"Mina ngibona engani abafundi lababalisi abavikelekanga kumkhuhlane we-Corona. Ababalisi khathesi bahamba bengazange bathole i-vaccine, okokuthi mhlawumbe bekungaba ngcono nga bebephiwe ithuba lokukhangelwa njengezisebenzi eziqakathekileyo ba-vaccinator izikolo zingakavulwa. Nxa sikhangela abafundi bona, lokhe bengakaze bajayele ukugqoka ama mask lokugeza izandla kokuphela, okwakhathesi okungabe kungcono yikuthi amanani ama-cases amatsha aphansi kodwa ingozi yabafundi lababalisi yokuthi babambe iCoronavirus mina ngiyibona ilokhe inkulu kakhulu."
Abantwana abakhangelelwe ukuya ezikolo kusasa ngabaloba imihloliso etshiyeneyo. Abanye abakuzigaba ezitshiyeneyo bazalandela ngeviki ezayo.