Lokhu bengabonakali abatsha abathathu abakubandla leMovement for Democratic Change (MDC) ekhokhelwa nguMnu. Nelson Chamisa okucatshangelwa ukuthi bathunjwe ngoLwesithathu ngabezomvikela eZimbabwe ngesikhathi betshengisela eHarare bekhonona ngokuswelakala kokudla ngesikhathi abantu bevalelwe ezindlini uhulumende ezama ukuvimba ukumemetheka komkhuhlane weCoronavirus COVID-19.
Abathathu laba nguNkosazana Joanna Mamombe, omele iHarare West edale lephalamende, umsekeli kamholi wabatsha uCecelia Chimbiri lomsekeli womhleli wezemisebenzi yabatsha uNetsai Marova.
Kubikwa ukuthi babotshwe phandle kwenkundla yemidlalo iNational Sports Stadium besetheswa amacala okutshengisela eWarren Park lapho akade bekhala ngokwehluleka kukahulumende ukunika ukudla abaswelayo abavalelwe ezindlini.
Amapholisa akhiphe umbiko ebulenjini beInternet kukhasi labo eleTwitter besithi kabakwazi lapho okulabantu laba kodwa isikhulumeli samapholisa uSenior Assistant Commissioner Paul Nyathi utshele iphephandaba leDaily News ngoLwesithathu ukuba kulabantu ababotshiweyo eHarare ababetshengisela emigwaqweni.
Imizamo yokuzwisisa ngalokhu yehlule ngoba uNyathi ubengadobhi umakhalekhukhwini wakhe.
Igqwetha labathathu laba, uMnu Jeremiah Bamu, uthi abatsha laba kabazakali ukuba bangaphi ngemva kokubotshwa endaweni duzane leNational Sport Stadium.
UBamu wazise ukuba uzacela idale laphezulu eleHigh Court ukuthi litshele amapholisa alandele umthetho aveze lapho abantu laba abasiwe khona.
Unobhala wabatsha kubandla leMDC, uMnu. Gift Ostallos Siziba, uthi okwenzakalayo lokhu kutshengisa ucuku lukahulumende webandla leZanu PF.
Olwela amalungelo abantu, uMnu. Mlungisi Dube, uthi uhulumende kumele alandele umthetho nxa ebopha abantu.
“Kuyinto edanisayo kakhulu etshengisa ukuba uhulumende kalandaba lamalungelo abantu. Kulokuthi balungise okuhlupha uzulu babophana labantu njalo umuntu engabotshwa kumele ahanjiswe emthwethwandaba.”
Kodwa omelwa abatsha kubandla leZanu PF, uMnu. Mabutho Moyo, usole kakhulu ukutshengisela kwabatsha laba ngesikhathi ilizwe lilwisana lomkhuhlane weCOVID-19.
“… Lokhu kuveza ukuba ibandla labo aliqakathekisi impilo yabantu. Umthetho weZimbabwe awungeke ukwamukele lokhu ngoba abakwenzayo kwenza umkhuhlane umemetheke.”
Ukungabonakali kwabathathu laba kwethusa abanengi ngoba eleZimbabwe lilembali yokuthunjwa kwabantu ababalisa amalunga ebandla leZapu elalikhokhelwa ngumuyi uJoshua Nkomo, intathelizindaba uItai Dzamara owathunjwa ngomnyaka ka 2015 labanye abanengi.
