Inhlanganiso zababalisi ezitshiyeneyo zithi uMongameli Emmerson Mnangagwa sokumele angenele kwezemfundo ngoba ababalisi abedlula inkulungwane ezilikhulu – 100,000 bakhalala umsebenzi bekhonona ngeholo eliphansi njalo lokuswelakala kwamanzi, ama sanitizers lokunye okokuvimba ukumemetheka komkhuhlane weCOVID-19 ezikolo ezivulwe ngoMvulo.
Umbiko owethulwe namuhla zinhlanganiso zababalisi eziyisitshiyangalombili uveza ukuthi ababalisi abanengi bakhalala umsebenzi kuthi abayigcosana bahamba ezikolo bafike bezihlalele abantwana benganzi lutho.
Kumbiko lo, ababalisi bathi kumele umphathintambo wezemfundo, uMnu. Cain Mathema, ayekele ukwethusela ukuthi uzaqhatsha ababalisi abazinkulungwane ezilitshumi – 10,000 abazathatha izikhundla zalabo abakhalala umsebenzi. Inhlanganiso lezi zithi kumele uMnangagwa angenele kudaba lolu ngoba banengi ababalisi abaya ezikolo labo asebekhalala umsebenzi besesaba ukuthi bengaba lomkhuhlane weCOVID-19 njengoba kungelamanzi kwenzinye izikolo lokunye okokuvimba umkhuhlane weCoronavirus.
Bafuna ukuthi bahole amadola eMelika hatshi imali yeZimbabwe abathi kayisathengi lutho. UMathema kukhanya esezama ukukhulumisana lababalisi loba nje etshele iStudio 7 ngeSonto ukuba kazilutho ngababalisi abafuna ukuhola amadola eMelika.
UMathema wathi konke sokulungisiwe ezikolo ukuze abantwana bafunde kahle.
Okwamanje ababalisi labazali bakhala ngokuswelakala kwamanzi ezikolo. UNkosikazi Monica Mutsvanga, umphathintambo wohlangothi lukahulumende olubona ngokwethulwa kwemibiko, usanda kwethula umbiko othi kumele kuvalwe izikolo ezingela manzi. Umbalisi ofundisa kwesinye isikolo koBulawayo, uMnu. Sandile Musa, uyakusekela lokhu.
“Indaba yamanzi leyi ingiphatha kabi kakhulu nxa ngikhangela lesikhathi esikiso nxa kuswelakala amanzi ezikolweni sifaka abantwana engozini kanye lempilo zethu ababalisi egozini kumkhuhlane ongamemetheka onjenge Cholera. Isicelo sami yikuthi nga uhulumende uyasenzela umzamo ukuthi sibelamanzi ezikolweni bekwazi ukugeza izandla nxa besuka ezambuzini. Kungaba lusizi kakhulu sisuka kokunye singena kokunye.”
Lokhu kusekelwa njalo nguMnu. Mkhokheli Ndlovu othi kwakumele uhulumende alungiselele kahle ukuvulwa kwezikolo.
UNkosikazi Sitshengisiwe Ndlovu, olomtwana ofunda ugwalo lwesikhombisa, laye udlela evalweni.
“Sikhathezekile njengabazali ngoba kulomkhuhlane lo esibhekane lawo khathesi umkhuhlane lo kumele kube lamanzi ukuze sincediseke ekuvikeleni umkhuhlane, abantwana bavikela njani umkhuhlane akula manzi. Besicela ukuthi ngabe kuyalungisiswa sesingaqhamukelwa yimikhuhlane akumangalisi ukuthi sekungatholakala abantwana abalomkhuhlane ngenxa yokuswelakala kwamanzi.”
Sehlulekile ukukhuluma leziphathamandla zekhansili yako Bulawayo ngokuswelakala kwamanzi ezikolo lobanje kusaziwa ukuthi ayasilela amanzi edolobheni leli. Isikhulumi sekhansili uNkosikazi Nesisa Mpofu ubelokhu engaphendulanga imbuzo ethi usemhlanganweni ngesikhathi sisiya emoyeni.