Ababalisi abakunhlanganiso eyeProgressive Teachers Union of Zimbabwe (PTUZ) bathi akumelanga amalunga abo ayehlola abantwana ngesikhathi beloba imihloliso yalonyaka ngoba uhulumende kafuni ukubahlawula imali yokwenza lokhu.
UMnu. Vusumusi Mahlangu, omunye wabaphathintambo kunhlanganiso yePTUZ uthi iZimbabwe Schools Examinations Council, ithi kumele bahlawulwe luhlangothi lukahulumende oluqhatsha izisebenzi.
IZIMSEC isanda kulobela inhlanganiso le incwadi eveza ukuba kabasoze babahlawule imali yokuqhuba inhlelo zokuhlola abantwana ngesikhathi beloba imihloliso, okubizwa ngeSilungu ngokuthi yi-Invigilation.
Incwadi le iveza ukuba kumele belungise udaba lolu lohlangothi olwePublic Service Commission.
Kasenelisanga ukukhuluma leziphathamandla zohlangothi lolu.
UMahlangu utshele umsakazo weStudio 7 ukuthi kabasoze bancedise abantwana abaloba imihloliso nxa bengahlawulwanga imali njengalokhu okwenzakala iminyaka yonke.