Izizalwane zeZimbabwe ezilamapermit eZimbabwe Exemption Permits kweleSouth Africa zithi kunengi kakhulu okuzikhathazayo ngesikhathi bemelele ucwaningo oluzakwenziwa ngumphathintambo wogatsha lwendaba zasekhaya ngomthelela ozakuba khona nxa amapermit la angesulwa.
Isimemezelo sokwengezwa kwesikhathi samapermit eZEP ngomnyaka ogcweleyo esenziwe ngumphathintambo wogatsha lwendaba zasekhaya kweleSouth Africa uMnumzana Leon Schreiber ngoLwezi womnyaka ophelileyo, singene emlonyeni simnandi okoluju kodwa sesifike esiswini sababa gamu okwesihaqa.
Inengi labasebenzisa ibhanga leCapitec bavuke ngomnyaka omutsha amabhuku abo alelibhangaga evaliwe kuthiwa ngoba amapermit abo aphelelwe yisikhathi. Lobanje leli bhanga seliphinde lawavula lamabhuku, umngcinisihlalo wenhlanganiso elwela amalungelo abesifazana beZimbabwe kweleSouth Africa eyeZim imbokodo, uNkosazana Victress Mathuthu, uthi lokhu kukhombisa ukuthi ikusasa yabeZimbabwe laba kweleSouth Africa ilenge ngomnxeba.
“Sitsheliwe ukuthi siyecela amawaiver. Singacela amawaiver sisuke siye aplaya ama mainstream visa. Abanye balokhe besenza lokho. Soku extendiwe futhi manje, sokubuya i directive ethi kusalindwe lokho okwatshiwo yicourt, esingakwaziyo ukuthi ngoba ngapha kuthiwa abantu baqhubeke beaplaya ngapha kuthiwa kulindwe izinqumo lezo ezakhitshwa yicourt, so, asazi.”
Umgcinisihlalo wenhlanganiso yeZimbabwe Community in South Africa, uMnumzana Ngqabutho Mabhena, uthi minengi kakhulu imibuzo abalayo ngesikhathi bekhangelele ukuthi uSchreiber aqale uhlelo lokuxoxisana lezizalwane zeZimbabwe ngekusasa yamapermit eZEP.
“Abantu balindile. Abakwazi ukuthi kuzaconsultwa njani ngoba nxa ubhalela uhulumende awungeke uzibhalele ungatholanga abomthetho abangakuncedisa ukuthi ubhale into ezazwisiseka. Okunye futhi siyananzelela ukuthi banengi abantu asebe aplayele amawaiver. Laba abangakenzi lutho sithi hayi abantu bengatatazeli kabalinde mhlawumbe kusiyafika uFebruary sicabanga ukuthi uMinister uyabe esekhulumile ukuthi iconsultation izahamba njani.”
Asebeqale ukufaka izicelo zamanye amapermit bathi bahlutshwa yikuthi kuzakwenzakalani nxa sekufuze bavuselele amapermit abo amatsha-la njengoba siyabe singasekho isivikelo seZEP esenze kwabalula ukuthi bawathole.
Kodwake ingcitshi kwezomthetho uMnumzana Vusumuzi Sibanda uthi indlela umthethwandaba weHigh Court owalaya ukuthi loludaba lulungiswe ngayo ilezivikelo ezinengi ezizakwenza ukuthi kube lula ukuphikisa emthethwandaba isinqumo sikamphathintambo nxa senziwe ngendlela etshaya indiva izikhalazo zabeZimbabwe laba.
“Ungqongqoshe uzoba ebatshela ukuthi isinqumo sakhe ngesokuthi engabe esaqhubeka ngamaZEP permits ngoba ubona engathi izizatho ezazikhandelwe la mapermit azisekho. Okutsho khona ukuthi abantu bazophakamisa khona ukuthi sebehlale isikhathi eside kakhulu eSouth Africa, njalo bacabanga ukuthi sekufanele bathole ubuhlali balapha ekhaya, ama permanent residency. Sebehleli la ekhaya balenza ikhaya labo, bathenga lemizi bekhokha lentela njalo balengane ezisesikolweni njalo bazalahlekelwa yimisebenzi abalamsebenzi abazayithola uma besiya kwelaseZimbabwe.”
Kwelakhe icele, umphathintambo wogatsha lwendaba zasekhaya uMnumzana Leon Schreiber uthi usemi kumbiko wakhe awethule egwalweni likahulumende olwe Gazette yamhlaka 29 Lwezi 2024.
Kule igazzette uthi inhloso yakhe yokwengeza isikhathi sama ZEP kuze kube mhlaka 28 Lwezi 2025, yikuthi abe lethuba lokulandela isinqumo seGauteng High Court esathi kufanele athole imbono yabalama permit ukuthi bathini ngesinqumo sogatsha lwakhe sokuwesula.
USchreiber uthi uphakathi kokubumba ibhodi ezacebisa lolugatsha i Immigration Advisory Board umsebenzi wayo wakuqala ozakuba yikuthi yini okufanele ayenze ukulandela ngokugcweleyo isinqumo somthethwandaba ngodaba lwama ZEP.
Forum