Ukulahlwa kwemphahla lokudla yizakhamizi okwenzakala koBulawayo, kungemva kokuba abezomvikela sebeqale uhlelo lokukhwathaza indlu ngendlu bedinga lokutshaya labo abatholakala kumbe becatshangelwa ukuthi bangabe bethethe impahla ngokungekho emthethweni emavinkilini lezitolo.
Ezinye zalezi mpahla ezinjengamafiriji lokudla bekubonakala kujikelwe egangeni. Abantu bonke sebehlalela evalweni abathethe impahla ngokungekho emthethweni labangathathanga ngoba emzini wakho kungatholakala kulezinto ezinengi ongabe uzithengelwe ngabantwana eGoli sokuyabonakala angani uzithethe emavinkilini ngesikhathi sokutshengisela ubusubotshwa loba ukutshaywa.
Esinye isakhamuzi seNkulumane esingathandanga ukuveza igama, uthi ubone kungcono ukuyatshiya impahla lezi azithathayo egangeni ngoba sesesabela impilo yakhe.
“Besesiyibonile sure ikhisimusi ibuya okwesibili kambe sizithathela impahla singakhiphanga yona cent.Mina njengami ngangithethe I grocery engani ithe xaxa,kumbe ngahamba ngaphinda kabili kathathu emagrosa ethu.Kodwa khathesi ayisadleki igrocery leyi isitshisa,iyatshisa sibili,ngoba abanye lapha koSekusile ngabatshayiweyo abanye ngabavalelweyo.Mina sengibone kungcono ngiyelahlela egangeni sibili ukuthi lapho amapholisa lamasotsha bebuya kimi bathole kungelalutho ngoba ngingumama olabantwana bakithi,ukuthi ngikhanye sengisiya fela ejele ngenxa ye grocery ngitsho sibili,sengilahlile. ”
Osakhulayo umnumzana Ndaba Mguni ohlala eNkulumane koSekusile, uthi sekunzima phandle ngoba abezebutho behamba ngendlu ngendlu bedinga abathatha impahla ezitolo.
“Sekuyilahla lapha phandle, susithi ungabona isotsha emgwagweni utshintshe indlela. Mina lamajida sasithethe utshwala le grocery kamasalu, kodwa ngicine ngifihla okunye egangeni ngoba amasotsha seduze lathi. Ngithe ngikukhangela later ngathola zero, amapholisa sekudobhile. Kodwa asikwazi ukuthi labo amapholisa bayakubisela ezitolo kumbe labo bayazidlela.”
Unkosikazi Sizwile Ndlovu ohlala eSizinda uthi ubone omakhelwane bakhe bebisela ngobusuku impahla abazithathayo. Abanye bebengabazama ukugebha ezingadini bafihle.
“Mina ngibona lokhu okwenziwa ngamasotsha kulungile sibili,kabalandelelwe bonke abatshontshileyo impahla ezitolo.Abanye abangakithi besebethwala nzima bebisela ngobusuku impahla abazithathayo,kwezinye indawo bebegebhela engadini zabo befihla.Kodwa kuthwa izinja zamapholisa bezinuka ziphande lokhu okufihliweyo.Kambe sure sekulilizwe bani abantu besenza umathanda kangaka,kabajeziswe sibili.”
Unkosikazi Thoko Mabhena esinye isakhamuzi seNkulumane ukhala ngokuthi ulempahla ezinengi kakhulu endlini yakhe, ngoba ubetshaya i club ngomnyaka ophelileyo. Uthi kala maphepha ayibufakazi bokuthi impahla ngezakhe, sesesaba ukuthi angathathelwa impahla lezi.
“Mina ngile stress ngilapha,ngoba ngile grocery enengi kakhulu kimi endlini.Nxa amasotsha ehamba ngendlu ngendlu ekhangela,mina ezami izinto azila ma receipt angaba yibufakazi bami.So thina esasidlala iclub senza njani ngoba phela balakho ukusithathela besithi sitshotshile lathi,ngisevalweni ngilapha.Sengikhulekela ukuthi ngitshayisane labangazwisisa mhlana bezokhangela kimi endlini. ”
Inengi labantu selibisele impahla abazithathayo ezitolo ngeviki ephelileyo, ngoba beseseba amapholisa lamasotsha asehamba ngendlu ngendlu bedinga laba bantu. Abanye ngabavumelana labezothemtho ukuthi bajeziswe abatholakala belempahla lezi abanye ngabakhala ngempahla zabo abalazo ezindlini ezingela maphepha akhomba ukuthi ngezabo.
Abezomvikela lokhe beqhubeka bephakathi kwabantu bezama ukwenqabela okunye njalo ukutshengisela okungacina kusiba lodlakela.
Abebutho bona babikwa lokhe bekhahlameza ababonakala bebathatha iimifanekiso kungaba yizithombe loba amavideo, kumbe ongabe ecatshangelwa ukuthi usebenzelana labamabandla aphikisayo kumbe inhlanganiso ezizimeleyo ezilwela ilungelo loluntu.
