Iqembu labesilisa elimela ilizwe emdlalweni wenguqu elaziwa kakhulu ngegama elithi Zimbabwe Warriors libe ngutshiki lobhanqa 0 ka 0 lele Bafana Bafana elase South Africa namhla emini.
Atshayane aze abhekana amaqembu athi elama Warriors elase Zimbabwe kanye lele Bafana Bafana elase South Africa kungela elenelise ukulitshayela emambuleni.
Limpumela itshiye womabili lawa maqembu elomklomelo owodwa ngalinye kusibaya sika Group G, semidlalo yokudinga amaqembu azancintisa kunkezo yamazwe womhlaba eyeWorld Cup qualifier.
Obebukele lumdlalo uSibonakaliso Ndlovu uthi umdlalo wanamhlanje bekuyisidudu ebesingabukeleki.
“Ibhola lakhona belingachazi. Ngingazi ukuthi kumbe kungoba abadlali bakwele Zimbabwe abanengi abenelisanga ukubuya. Leqembu le South Africa lalo namhla alingidlalelanga ngendlela ecacileyo angazi kumbe kungenxa yokuthi imidlalo yabo yeligi layo isanda kuqala.
Sisiya phambili angazi sibili ukuthi sizenelisa yini ukuyadlala kumidlalo yezizwe zomhlaba,” kutsho uNdlovu.
IZimbabwe le South Africa zikusibaya sika Group G ndawonye le Ghana kanye le Ethiopia zona ezidlala namhla ebusuku.
NgoMvulo mhla ziyisikhombisa iqembu le South Africa lizemukela ele Ghana kuthi ele Zimbabwe lizavakatshela kwele Ethiopia ngoLwesibili.
Ekupheleni kwemidlalo yezibaya amaqembu azaqeda ehlezi phezu kwezibaya ezilitshumi azafakwa embizeni axegwe kucine kusele amahlanu okuyiwo azakuyadlala kumncintiswano wezizwe zomhlaba ozaqhutshelwa elizweni lase Qatar ngomnyaka ozayo.
Umqhudelwano phakathi kwelizwe le Zimbabwe lele South Africa uqhubekela phambili kusasa ngoMgqibelo lapho iqembu le Zimbabwe elizintshantshu zomdlalo wenguqu owabesifazane ele Black Rhinos lizadibana lele Mamelodi Sundowns elase South Africa kudingwa intshantshu zesigaba se COSAFA.
Iqembu elizanqoba kusasa lizakuyaphatheka kumidlalo yokudinga intshantshu zezwekazi lase Africa ezaqhutshelwa elizweni lase Egypt ekupheleni kwalonyaka.
