Inhlanganiso ezilwela ilungelo loluntu ezibalisa eye Amnesty International leye Human Rights Commission sezisole uhlelo lukahulumende olokudiliza izindlu ezibikwa zingakhiwanga ngokusemthethweni eChitungwiza leEpworth zisithi lokhu yikwephula ilungelo loluntu.
Lokhu kwenzakala umanyano wenhlanganiso ezilwela amalungelo ezakhamizi owe Harare Metropolitan Residents Forum usucele uMongameli Robert Mugabe losikomitshi wamapholisa uMnu. Augustine Chihuri ukuthi bangenele kudaba lokudilizwa kwezindlu e Chitungwiza leEpworth.
UMnu. Marvellous Khumalo, umgcinisihlalo we Chitungwisa Residents Association, oyisiphathamandla se Harare Metropolitan Residents Forum, utshele uSithandekile Mhlanga weStudio 7 ukuthi abantu abadilizelwa izindlu bathwele amagabha avuzayo njalo bathembe ukuthi umongameli Mugabe loMnu. Chihuri bazaphendula ugwalo lwabo lwe petition ebacela ukuthi bengenele kuloludaba amalanga ayisikhombisa engekedluli.
