Yisisanasana kwezombusazwe ibandla leMDC Renewal lisenza umhlangano walo omkhulu wokukhetha inkokheli, oweCongress, ngapha abasekela uNkosikazi Joice Mujuru besethula ugwalo lwabo lweziqondiso zokusebenzela uzulu kodwa bengaphumi mgceke ukuthi sebebumba ibandla lezombusazwe kumbe hatshi.
Kuthi ibandla leMDC-T lalo liphakathi kohlelo lokuvuselela izigaba umkhokheli walo uMnu. Morgan Tsvangirai engenisa imihlngano endaweni ezehlukeneyo zelizwe , esethula afuna kwenziwe kungaqhutshwa ukhetho.
Abanye ngabathi ngabe amabandla wonke aphikisayo ayamanyana phambilini kokhetho ukwenzela ukuthi anqobe ibandla le Zanu PF.
Kodwa abanye njalo ngabathi amabandla la kawala kuvumelana njalo kawangeke asebenzelana.
Kambe kunga kusenzakalani? Ingcwethi ezicubungula ezombusazwe, okugoqela uMnu. Mlamuli Nkomo bathi yebo siyawabona amabandla ezombusazwe abunjwayo mihla ngemihla kodwa uzulu umbuzo omkhulu alawo ngothi kambe ukubunjwa kwawo kumnceda ngani. Ngokubona kwakhe uNkomo uthi lokhu kwanda kwazo lawa mabandla sokuzakenza inkhundla yabantu ababanga umbuso layo ibe nkulu okuzakhokhekhelela ekuthini kuphoselanwe aqhatha njalo lenhlamba zibe nengi.
Umsekeli wesikhulumeli sebandla leMDC-T koBulawayo, uMnu. Felix Magalela Sibanda Mafa yena uthi leli nyathelo uylamukela ngenjabulo enkulu ngoba kuveza ukuthi ebantwini beZimbabwe sokuthe dlwe manje, sebevuse inkophe ukuthi kakumelanga bephonguyamukela inkokheli engela msebenzi njalo kuveza ukwala umbuso webandla linye owe One Party State. .
