Inguquko yempilo lesikhathi sekulethe utshintsho kundlela ilanga lekhisimusi ebelithakazelelwa ngayo eminyakeni edluleyo lakulezi insuku. Impilo yakulezi insuku isiyenze kutholakale lula izinto ebezihlupha ukutholakala kudala okuyinto esiguqule kakhulu indlela osekuthakazelelwa ngayo ikhisimusi.
Umculi weZimbabwe uZibusiso Moyo ocula enguZee, useyethule idlalale elithi Edladleni, kusitsho ukuthi sikhumbula ekhaya.
Linsizwa ethwetshulwe yingwe ePlumtree ithi kule ingoma yakhe entsha eyomdumo weAfrokwasa, ufuna ukukhumbuza abantu indlela zakudala abebethakazelela ngazo ilanga lekhisimusi.
Uthi kudala bekuthi nxa kuzavuka kuyikhisimusi kuhlatshwe imbuzi kumbe inkomo ukuze inyama ilale ithonta igazi. Ngalobu busuku amanina lamantombazana bebepheka amakhekhe lamakhekhana.
Akusakhulunywake ngesinkwa njengoba uthi bekuthengwa inqwaba yazo kanye lejemu ebomvu. Uthi Bekuthi nxa liphuma elangekhisimusi abantwana sebevuke kudala ukuze bayebona ilanga ligida njengokwenkolelo yaleso sikhathi.
Emkulwinike bebebizwa luqatshi lwamabhanzi. Bebethi bengena sekusikelelwe amabhemu ezinkwa egcotshwe ngejemu ebomvu gebhu. Lowo lalowo ubeqondana lowakhe umganu uphuphume isinkwa, amakhekhe, amabhanzi lokungamaqatha kwenyama.
Yikokenje kule ingoma yakhe ayicule exhaswe ngumculi owaziwayo eBotswana uSlayza ethi sikhumbula ekhaya. Uthi bekuthi ngemva kwamatiye kugezwe abantu bakhuhle inikenke, bazipikle ngevaselina bese besiyagqoka ezintsha. Enyaweni kwakuvame ithendafuthi ebafaneni kuthi amantombazana esaziwa ngabothomi. Olenhlanhla wayethola isandakhi.
Isidlo semini sona bekuyikudla okudliwa ngekhisimusi kuphela okufana labo rayisi, osalathi kwesinye isikhathi kube lamaphudini. Konke lokhu bekuphelekezelwa yinyama abantu bazitike izisu zize zibe bomvu gebhu.
UZee uthi konke lokhoke sekuguqukile lamhlanje. Uthi injongoke yikuthi ezintsha sezigqokwa nsukuzonke, kantike orayisi, osaladi lenyama sokuyikudla kwemihla yonke.
Kudala bekukhona umuzi owodwa olerediyo enkulu lapho obekubuthana khona isigaba sonke kugidwe kuze kuse. Bekuthi ngezikhathi zantambama intsha esikhulakhulile iye emavinkilini lapho obekugidwa khona umuntu aze akhuzwe yibuthongo.
Akusakhulunywa ngesinkwa njengoba ngaleso sikhathi besiyimvelakancane kanti kulezi insuku sesidliwa size silahlwe emabhimu obekulizilo izolo.
Sekukalutshwana njalo ukuthi uthole kubuthanelwe irediyo yakozibanyana njengoba phose yonke imizi isilawo amarediyo.
UZee uthi nxa esecula ngaloludaba uzwe esethi guga sithebe kade wacholela lobanje esaselokuyiminyaka okungamatshumi amabili lanhlanu ezelwe.
Lonake lalo ilanga lekhisimusi ikakhulu emadolobheni seliphosa lifane lawo wonke amalanga. Loba kunjalo loludokoza lwekhisimusi yakudala lusasekhonanyana emakhaya laphopho osathola khona abantu bececile besidla amafidlongo lezibiliboco. Yikhonje uZee ethi khumbula Edladleni.
