Kuliviki kuhlelo Woza Friday intathelizindaba yethu uJoseph Njanji usethulela ingxoxo ayenze lomculi wengoma zokholo uThembie Sibanda yena osebenza leqembu elaziwa ngokuthi Sisters of Paradise.
USithembiseni Sibanda ngumkhokheli weqembu elicula ingoma zokholo ele Sisters of Paradise njalo uqale ukuhlabela esendaweni yesiSigodini lapho azalelwe khona.
Lusisi oleminyaka eyokuzalwa engamatshumi amathathu uphakathi komkhankaso wokuba imisebenzi yeqembu lakhe yaziwe kwele Zimbabwe njalo uphethe idlalade leqembu lakhe elesithathu elilegama elithiwa Sinjalo.
Lelidlalade elithiwa 'Sinjalo' lilengoma ezilitshumi lane njalo licindezelwe lonyaka elizweni le South Africa okuyikho futhi abaphekela khona
idlalade labo elakuqala eliphume ngomnyaka ka 2011 elithiwa 'Mhla uJesu ebuya' kanye lelicindezelwe nyakenye ngomnyaka ka 2013 elithiwa 'Ngubani Ozayongena'.
Intombi kaSibanda ithi ezomculo iziqale ngesikhathi isakhula ifunda esikolo se Shale esitholakala khonale endaweni yeSigodini kodwa ithuba lokucindezela ulithole lapho esechaphe wayadinga umsebenzi elizweni le South Africa.
Amanye amalunga eqembu le Sisters of Paradise ngagoqela uAbigail Moyo, uSicelo Sibanda, uPenelope, uNozipho, uMbali, uAnele kanye lo Lisa.
Indimi abazisebenzisa nxa behlabela ngezigoqela isiNdebele, isiNgisi, isiTswana kanye lesiShona.
