Kuliviki kuhlelo Woza Friday silethulela ingxoxo intathelizindaba yethu yezemidlalo uJoseph Njanji ayenze lo Mbo Mahocs yena ongumculi ephinde njalo abe ngumlingisi kumidlalo kamabonakude.
Igama elithi Mbo Mahocs lisematheni kazulu olandela ezemidlalo eyokuzilibazisa edolobheni lako Bulawayo kulezinsuku njengoba engomunye walabo abazama ukuphakamisa ezemidlalo kontuthu ziyathunqa.
Lusisi oleminyaka engamatshumi amabili lesikhombisa eyokuzalwa utholakala kwezomculo, ezokulingisa aphinde njalo abe ngumphathi wenhlelo ezehlukeneyo ezigoqela eziphuma kumabona kude kanye lezenzelwa endaweni ezithile.
Igama elithi Mbo Mahocs lisuka egameni lakhe elokuzalwa elithi Mbonisi Mahonondo njalo uqale ukwenza ezemidlalo ngesikhathi efunda imfundo yaphezulu ezikolo ezigoqela eseMinda High School kanye lese Eveline High.
Isintu sithi ikhula lamanono ayo yikho uthando lokwenza ezemidlalo luyale lulokhu lukhona ku Mbo kwathi ngesikhathi ehlala elizweni le South Africa ungene esikolo esifundisa abalingisi wangezelela ulwazi lwakhe.
Ekuphendukeni kwakhe kwele Zimbabwe uqhubekele phambili esenza okuphathelene lezemidlalo njalo nyakenye wenelise ukucindezela ingoma ethiwa Kwantuthu esebenza ndawonye lo Bukhosi Magabo owaziwa ngebizo lomsebenzi elithiwa LavaeD.
Bobabili uMbo lo LavaeD babambisane lomculi uExmile bacindezela ingoma ethiwa "Ngibambe".
