Kulimpelaviki kuhlelo lwe Woza Friday intathelizindaba yethu uJoseph Njanji usethulela ingxoxo ayenze lomculi osakhulayo uTatenda Mumba yena owaziwa ngegama lokucula elithiwa Deep Dope Pantsula.
Ukuphumelela kwabaculi abasebenza besedolobheni lako Bulawayo akusiyonto elula ngoba kwelinye icele abahlali balelidolobho besaziwa kakhulu ngokuthakazelela umculo ovela elizweni le South Africa ikanti kwelinye icele amathuba okuba ingoma zabo zitshaywe emisakazweni emalutshwane ngoba imisakazo eminengi esakaza elizweni itholakala esigodlweni iHarare.
Loba kunjalo umculi osakhulayo uTatenda Mumba yena owaziwa kakhulu ngegama elithi Deep Dope Pantsula uthi lesisimo silakho ukuguquka ngoba abasakhulayo balelidolobho sebetshengisela ukukhwabitha imisebenzi yabacula umculo we Hip – Hop ohlanganiswe le Kwaito.
UDeep Dope Pantsula uthi ukhule ethakazelela umculo we urban grooves kodwa yena ungene kwezomculo ngesikhathi esenza izifundo zika Grade 7 esikolo se St Patricks eMakokoba.
Uqale ukucindezela ingoma esebenza labangane bakhe akhule labo elokitshini le Mzilikazi ngomnyaka ka 2010 kodwa ukuswelakala kosekelo lwemali kudale ukuba imisebenzi yabo iphelele emoyeni.
Lonyaka ke uDeep Dope ukhuphule indlela asebenza ngayo wacindezela ingoma ethiwa iSigebengu.
Lumculi useke wasebenza njalo lomculi osegxile impande uPronix bacindezela ingoma ezimbalwa ezigoqela ethiwa Never Forget You kanye lethiwa Abantwana.
Uthi ingoma zakhe wenza ukuzipha abalandeli bakhe mathupha esebenzisa indlela zakulezinsuku ezifana le Whatsapp le Bluetooth ngoba ethi le yindlela yokuba ekhulise igama lakhe.
UDeep Dope Pantsula uqhubekele phambili wathi lonyaka ngumnyaka wokuba akhulise igama lakhe kuthi ngomnyaka ozayo uzakhipha idlalade lakhe lakuqala okuyilo azabe ekhangelele ukuba limlethele imali.
Nango ephuma enkundleni ngengoma ethiwa Abantwana ayicule ephathisana lo Pronix kanye lo Blazey Boi.
