KuWoza Friday liviki silombukiso obizwa ngokuthi “Thatha Watshi” oqale ngoLwesine ntambama eNational Art Gallery esedolobheni lako Bulawayo njalo ukhangelelwe ukuze uyefika emaphethelweni ekupheleni kwenyanga ka Zibandlela ngomnyaka ozayo.
Isiphathamandla se National Arts Gallery edolobheni lako Bulawayo uClifford Zulu uchaze imbukiso ye Thatha njengohlelo olugoqela izakhamizi kanye lalabo abenza umsebenzi wokucomba edolobheni lako Bulawayo.
Kulemisebenzi efika amatshumi amane lantathu (43) eyenziwe ngababazayo lokucomba kwele MaNdebeleni ebukiswe eNational Arts Gallery njalo yonke igxile emfanekisweni wenkombalanga kodwa ibunjwe kusentshenziswa izinto ezitshiyeneyo.
Omunye walaba abalemisebenzi etshengiswa kulindawo ngu Israel Israel yena ochaze isikhathi njengento eqakatheke kakhulu empilweni yabantu.
UZulu uqhubekele phambili wathi lonyaka bakhethe ukusebenza lalabo abenza umsebenzi wokucomba ukuze bazakale kuthi lemisebenzi yabo ifinyelele kuzulu kuthi abantu bayikhwabithwe besebebafakela izandla.
Umfoka Israel laye uvumelane lo Zulu ukuba ezokucomba abantu abansundu bazikhangelela phansi njalo uthi imfundiso yiyo esilelayo.
Kunhlelo ezadlulayo ezombukiso we Thatha uzulu ubecelwa ukuba aphatheke kuzo ngokuletha izinto ezifana lemifanekiso yakudala eyohlobo lwe black and white, ama radio angumhlobo mdala kanye lamabhayisikili acecisiweyo kodwa lonyaka lumlandu wetheswe abenza umsebenzi wokucomba ukuba kube yibo ababumba okutshiyeneyo okubakhumbuza ngokuqakatheka kwesikhathi.
Labo abafuna ukuthenga okuyabe kubahlabe umxhwele bakhululekile ukwenza njalo.
