KuWoza Friday liviki silensizwa esakhulayo ecula umculo kaMaskandi uMgcini Masuku leqembu lakhe le Sikabayishiye. Intathelizindaba yeStudio Seven uBenedict Nhlapho uxoxa lale insizwa eGoli ngedlalade layo lakuqala njalo elitsha elithi 'Dear Mama'.
UMgcini Masuku uthwetshulwe yingwe koSigola eMzingwane ngo 1990. Wayebizwa as abele emakwayeni esikolo kanye lasebandleni lakhe le 12 Apostles.
Ngo 2007 walubhekisa eGoli njengabanengi lapho okwathi ngemva kweminyaka emihlanu waqala uhambo lwakhe lwezomculo kaMaskandi. Amajongo amahle, Buthelezi Ndlovu, Sibisi Langalakhe, ngabanye balabo asebenza labo engakabumbi elakhe iqembu.
Lonyakake uMgcini ubumbe elakhe iqembu le Sikabayishiye wahle wethula idlalade lakhe lakuqala elithi Dear Mama. Laphake uthi wethula umbiko osemqoka kunina.
Ingoma ezimunyethwe yileli dlalade zilitshumi lambili. Zonake zigoqela uBanomona, Imali yami, Mkhwewami, Uxolo, inhlonipho lezinye.
Kule yona ethi maliyami uthi uyalila ngoba edliwa aze aphendulele izikhwama ngenye intombazana.
Zonake iziginci zikamgcini zithi nxa seziqunjwaqunjwa kube sengathi ngumuntu oxolisa engasathuli ngemva kokubanjwa eganga.
Uthike ezakhe ingoma uyazinyenyezelwa. Kantike uthi ingoma zakhe zilungele wonke umuntu kugoqela labakholwayo.Uthike ukuqhweba intambo zesiginci ngendlela enza ngayo kudingake ukuthi kube lokuzwisisana okukhulu phakathi kwalo ogadle isiginci lesiginci sakhe.
Linsizwa ithi isifiso sayo esisemqoka yikubona eindawo yakoSigola isiba labaculi abakhula baziwe umhlaba wonke.
Yenake kukhulu akuthembisa labo abazaqhubeka bemsekela emculweni wakhe.
Njengomuntu oseleminyaka eseGoli, le eyesithathu aphuma ngayo enkundleni uthi kulabo asebezame konke okwenziwa ngabanye eGoli kodwa kusehlula, ungesabi ukuvuma ukuthi sekwehlule uthathe ibhatshi lakho lemitshaqana yakho ubhekise amabombo emuva.
