KuWoza Friday liviki uBenedict Nhlapho uphethe idlalade elitsha lomculi womdumo kaMaskandi UZinjaziyamluma. Kulelidlalade lakhe elitsha elithi “iTraffic” elivele selisidla ubhedu emisakazweni yamarediyo leyabomabona kude kwele South Africa, lumculi uveza obala ukuthi umdumo kaMaskandi weZimbabwe usufike kubanga elihloniphekayo imbala.
UMxolisi Mavundla yinsizwa edabuka eMguzana, eTsholotsho phansi kukanduna uMahlathini ngenyakatho yesigabeni seMandebeleni. Linsizwa ezelwe ngomnyaka ka1982 ithi italenta layo lokucula lavela yalilolonga isacula imbube ngesikhathi esasesikolo.
Manengike amadlalade embube awacindezele eseseGoli leqembu lakhe leNkanyezi zezulu, kodwa kuthe ngo 2013 wakhetha ukuhamba ngonyawo lukaMaskandi.
Qede lapho waduma ngelithi Zinjaziyamluma, wethula idlalade lakhe lakuqala elithi "Kobandayo" lahle labeletha iDVD kungakapheli umnyaka. Lonyakake usekhithize leli elithi i"Traffic".
Kungqikilana ingoma ezilitshumi lambili kuleli dlalade kantike ucula ngakho konke okutholakala empilweni okugoqela ngitsho langeqembu leBosso Tshilamoya. Uthi injongo yengoma ezifana lale ngeyokukhumbuza uzulu ukuthi azigqaje ngento zakhe.
Italenta lale insizwa selenze wasebenzisana labo phose bonke abaculi beZimbabwe abaqhunsa umdumo kaMaskandi.Uthike lo owakhe ngumculo womdabu othi akubuyelwe emasikweni.
Lumculike kwele South Africa usezitholile inkalakatha yodumo. UZinjaziyamluma uthi sekukuwe ukuthi uthintane laye uzitholele lobu bunandi abanye asebevele sebezitika ngabo.
Kwabathanda ezokholo ke uphuma enkundleni ngale inzwisa ayicule lomculi wezokholo odumileyo kweleSouth Africa UBonakele.
