KuWoza Friday liviki uBenedict Nhlapho weStudio Seven, uxoxa lomculi weqembu elicula umdumo weRhumba eleExtra Cat Family, uKhulani Ncube yena oseyethule idlalade lakhe lesibili elithi uManqoba.
UKhulani Ncube uthwetshulwe yingwe eLupane ngo1987. Ezomculo uziqale esasesikolo ecula imbube eSimagoza Secondary.
Ubungcitshi bakhe kwezamakatali buzwakale mgceke kule eyezithandani ethi Nomathemba ephuma kulo idlalade lakhe elitsha elithi uManqoba.
UKhulani uthi lobanje ezokucula waziqala ngesicathamiya, ekufikeni kwakhe eBotswana, wathathwa ludumo lweziginci kwazibona esedlala iRhumba.
Ngo 2013 wethule idlalade lakhe lakuqala elithi eKhaya likababa okuyilo eselelanywe yileli elitsha elithi Umanqoba. Yenake uManqoba ulengoma eziyisikhombisa kugoqela Idada eliphaphayo, Masithandazeni, Nomathemba, lale ethi Baba Mthenjwa.
Linsizwa ithi esikufunde emculweni yikuthi umlandeli yinkosi, ngakho kufuze alalelwe njalo aphathwe kahle.
Uthike ikusasa lakhe leqembu le Extra CAT Family ulibona lilihle kakhulu. Injongo yakhe esemqoka yikuphumelela kwezomculo aziwe hatshi eZimbabwe kuphela kodwa langaphetsheya kolwandle.
Baculi beExtra Cat Family baphume enkundleni ngale ethi Idada eliphaphayo, ekhuluma ngenhlupho zalamuhla esezihlasela abafundileyo labangafundanga.
