KuWoza Friday liviki intathelizindaba yeStudio Seven uJoseph Njanji uxoxe lamalunga eqembu le Sunduza Dance Theatre elingelinye lamaqembu amadala acula umculo wembube edolobheni lako Bulawayo.
Iqembu le Sunduza ngelinye lamaqembu athuthukise umculo weMbube kweleZimbabwe njalo ngensuku zalo lisadla ubhedu belidume ngitsho laphetsheya kolwandle.
Kodwa isimo somnotho esingamanga kuhle elizweni kanye lokutshona kwamalunga alisungulayo kuphazamise ingqubela phambili yaleli qembu lacina indumela yalo ingasaziwa.
Bakhona ke abafowabo balawo madoda asedlula emhlabeni asevuselele leliqembu elicula umculo wembube lavuka khwatshu.
Amanye amalunga eqembu ngagoqela u Charles Banda ongumfowabo kamuyi uSimon, uSimba Sagidi, uKhaliphani Ndlovu, uMfundo Ncube, uNuke, u Leroy Sibanda kanye labodade ababili abathi uGugulethu Mhlanga kanye lo Mary.
Iqembu le Sunduza liyahlanganisa indimi ezitshiyeneyo ezitholakala elizweni leZimbabwe nxa licula nampa lapha besipha ingoma ethiwa Rainbow.
Ensukwini ezilandelayo iqembu leSunduza lizaqhuba uhlelo abalibiza ngokuthi Amasiko Expo ozakuba elokitshini lePumula lapho abatholakala khona.
Lumcimbi ukhangelelwe ukuba ubukise imisebenzi yezizalwane zalelilokitshi egoqela eyalabo abenza imisebenzi yezandla.
Okunengi ngalomkhosi weAmasiko Expo umfoka Sibanda uthi kuyatholakala ebulenjini njalo kutholakala ku www.sunduza.org kanye laku facebook kukhasi elithiwa Sunduza Dance Theatre kumbe laku You Tube lapho imisebenzi yabo etholakala ku Amasiko TV.