Kuhlelo lwe Woza Friday liviki uBenedict Nhlapho uxoxa loMbiwabo Brutas Ndebele oweqembu lomculo womdumo weRhumba eleMasendu Boys mayelana ledlalade labo elitsha elithi "Zinkulu".
Ngelesikhombisa idlalade leMasendu Boys leli elithi Zinkulu. Kantike umsunguli waleli qembu njalo engumkhokheli walo uMbiwabo Brutas Ndebele uthi luluju oludliwa umuntu ebotshelwe.
ULesani Reginald Ndlovu obona ngokuqhutshwa kuhle kwenhlelo zaleli qembu, uthi ingoma ezikulelidlalade ziphothulwe okomcaba wamasi.
Phakathi kwazo zoyisikhombisa ezikuleli dlalade le ethi Izinja kayivuthwanganje kuphela kodwa ivuthwe busu. UBrutas uthi isihloko saleli dlalade sifakaza khona ukuthi umkhulu umsebenzi abawenzileyo.
Izihloko zengoma zakhona lazo ziyakhanga njengoba kulabo Gotebuka, Izinja, Mhepo, Zinkulu, Mhaladzi, Mpengo lale ethi Umfudlala.
Ukuzeke zonke izinto zihambe ngendlela, uLesani uthi nguye olomsebenzi omkhulu wokubona ukuthi wonke kuyenzeka.
UBrutas uthi ongakalizwa leli dlalade akakawuzwa umculo. Obambe isiginci esintantalaza phambili kuleli dlalade nguKholwani Dube, kuthi ezimbili eziphakathi laphakathi zibe ku Alfread laye uKholwane njalo, besekuthi uDennis Khomazana uphethe esebhonga, kanti uMike Ncube nguye osengungwini.
UMbiwabo loLesani yibo abasemculweni kanti bathi zitholele elakho ungenzi njengembila eyagcina iswela umsila ngenxa yokulayezela.
