KuWoza Friday liviki UBenedict Nhlapho uliqhunsela inzwisa zengoma ezimunyethwe lidlalade eliphakathi kokuphekwa ngumculi we House Kwasa u Vivian Nkiwane.
Lintokazi evele isilamadlalade amabili egameni layo iphakathi kokuphaka idlalade lesithathu kantike uthi ufuna ukupha abalandeli bakhe inzwisa andubana bathole leli dlalade. Zimbili ingoma azethule njengenzwisa yaleli dlalade ethi Ingoma Yakithi lale ethi Sithandwa.
Lo NguVivian Nkiwane intokazi edabuka koMaqethuka eTsholotsho. Sekulesikhathi lintokazi ingene kwezomculo kodwa ngaleso sikhathi imisaziwa ngokugida emaqenjini agoqela i Mathonga Brothers, Mbiwabo, Masendu Brothers lo Allen Ndoda.
Ngo 2011 uVivian ucabange ukuziculela ezigidela wethula elakhe idlalade elithi Nomakanjani. Ngo 2013 ukhithize elinye esesithi Abazali bami. Khathesi ke ngo 2014 uthi likhona elizayo aselipheke lavuthwa kwasalanje ukuthi liphakwe.
Phakathi kwaleli dlalade ikhonale ethi Sithandwa kanti UVivian uthi izoluvuselela uthando kwabanengi.
Uyaqhubeka ethi ephuma emathandweni angene emasikweni ngale ethi Ingoma yakithi. UVivian uthi lonyaka ukhethe ukuthi abalandeli bakhe bathole inzwisa yedlalade lakhe ukuze lithi nxa lifika bevele sebelilindele ngamehlo abomvu. Lobanje engafuni ukutsho okunengi ngaleli dlalade, uthi lilezothando, esamasiko, ezifundisayo, ezixwayisayo lezokuzijabulisa.
Uthike njengoba indlela ibuzwa kwabaphambili, laye kunengi asekufundile kubaculi asebehambe phambili, kanti njalo ufuna ukufinyelela lapho asebekhona.
UVivian akasasebenzi yedwa kwezomculo. Uthi usekhethe ukusebenza lo Admire Mengezi Mpofu ukuthi abenguye ohlela konke okuphathelene lomculo wakhe kantike yena uMengezi uthi lumsebenzi ubaluleke kakhulu.
Kawujwayelekanga ke umculo ka Vivian njengoba exubanisa ikwasakwasa leHouse. UVivian uthi njengoba umculo wakhe umbaxambili kudingeke awuthe igama elimbaxa mbili. Uthike akubongayo yikuthi usekhulile kwezomculo. Akakhohlwake ukuxwayisa abalandeli bakhe ngezinto ezingabasiza empilweni.
Intokazi kaNkiwane ithi kungakapholi maseko uzabe eselethule idlalade lakhe elitsha. Kodwake uthi okuzangena kuthophele kubalandeli yindlela atshaya ngayo lokutshotshozela umdumo wekwasakwasa.