KuWoza Friday liviki uBenedict Nhlapho uqhunsa ingoma zamachacho apholileyo eziphuma esihlabelelweni samaSabatha ehlaziya njalo ukuthi kambe zilomutsho ofanayo na lengoma ezilamazwi.
La ngamachacho aphuma esihlabelelweni samaSabatha esethiwe igama lokuthi "uKrestu Esihlabelelweni". Lamaculo apholile, ahamba ngesiqubu sonwabu kwazise atshaya kuthophele enhliziweni.
Umnumnzana Alert Mazwi oculisa amakwaya ebandleni lamaSabatha, eleRivonia SDA Church, elise Melville eJohannesburg kweleSouth Africa, uthi lumculo wamachacho aphole kangaka awufaninje legabha elikhaliswa ngumoya. Uthi upholile unje uqukethe amazwi aqatha angenza indoda endala uyibone isibihla njengengane ingatshaywanga muntu.
Ikhonake le ethi kuyeza ukuhlwa hlala name nkosi. Omunye angayizwa athi ngumsindonje wamachacho amnandi.
Kodwa uMazwi uthi ngamazwi alowo osenhlungwini, osedelwe yizihlobo othi loba bonke bengitshiyile sengithembe wena nkosi hlala nami. Uthi kayisizo zosizi zodwa ezitshaywa ngamachacho angelamzwi. Zinengi ezentokozo njengale ethi Uyeza, yona athi ngumuntu osehlukunyezwe kakhulu ngumhlaba kodwa osethokozele ukuza kukaJesu ngethemba lokuthi inhlupheko zizaphela ahlanganiswe lezihlobo zakhe ezabhubhayo.
UMazwi uthi kakusizo zonke ingoma okufanele zingakhala kugidwe. Uthi ezamachacho apholileyo gangelamazwi zikhipha amadlabuzane emuntwini besezikhulumisana lenhliziyo.
Uthike nxa usosizini, uphelelwe ngamacebo, ungazi iyozalwa nkomoni, zitholele lo umculo opholileyo uphakamisele ilihlo lenhliziyo kuMvelingqangi uzakusiza.
