Inhlanganiso eselela abalambayo emhlabeni jikelele eyeWorld Food Program (WFP) ithi umumo wendlala usufike kuzinga elibi kakhulu eZimbabwe, okuzacina kudala ukuthi yabele ukudla abantu abangaba sebebhekane lokufa ngenxa yendlala kuphela ngoba ukudla okukhona akwaneli umuntu wonke okudingayo.
Isikhulumeli seWFP uMnu Tomson Phiri, kumbiko owethulwe yilinhlanganiso enkundleni yeX, uthe bazithola besesimeni esinzima esokubhekana labantu abalambileyo bebatshela ukuthi abenelisi ukubapha ukudla ngoba kumele baphe abanye abalambe ukwedlula bona.
I-WFP ithi umumo wendlala uzaqhubeka usiba mubi emhlabeni wonke jikelele njalo idinga imali engangeUS$16.9 billion eyokuselela abantu abedlula ikhulu lezigidi, 123 million.
EZimbabwe sikhuluma nje abantu abayizigidi phose eziyisitshiyangalombili, 7.7 million badinga ukuphathiswa ngokudla ngesiphangiphangi.
I-WFP ithi ihlose ukuphathisa abayizigidi phose ezimbili, 1,8 million eZimbabwe ngokudla kusikhatshana esilandelayo njalo ithi ukuze ikufeze lokhu idinga izigidi zamadola ezedlula amakhulu amabili, US$201 million.
Kulandela ukuna kwezulu kwezinye izigaba kuliviki, abanye babikwa sebeqalile ukulima lanxa isikhathi sesihambile.
Ingcwethi kwezokulima uMnu Mandla Nkomo utshele iStudio ukuthi abantu kumele balime ihlanyelo evuthwa masinyane.
Forum