Uzulu weZimbabwe upha imibono ehlukeneyo ngokwenzekala kwele Melika. Abanye bathi kungcolisa isithunzi selizwe leli lona elikhangelelwe ukuba libe ngumzekeliso omuhle kwamanye amazwe womhlaba. Kuthi abanye bathi ele Melika lilemithetho phansi kwesisekelo sombuso eyenza lenelise ukulungisisa inxabanxoza ekhona okwamanje.
Abasekeli bakaMongameli Donald Trump wele Melika, babe lokutshengisela okulodlakela bahlasela isakhiwo sedale lephalamende ese Capitol Hill besithi bafuna ukubonisa amalunga edale lephalamende insolo yabo ngokuqilwa okwenziwa umkhokheli wabo kukhetho olwenziwe ngoLwezi nyakenye.
Lokhu kumangalise abeZimbabwe abalandela ukhetho lwe Melika lona olwazakala ngokuqhutshwa ngokuthula langendlela ezibukekayo okumangalisayo.
Ingcitshi ecubungula ezombusazwe uMnu Leonard Kapisi usole kakhulu ukwenza kwabalandela baka Trump.
“Esikubona lapha yikuba ukhetho olwenziwe eMelika luveza ukuba kakumanga kuhle eMelika. UTrump utshengise ukuba lokhu okwenzakala emazweni afana lase Zimbabwe kuyenzakala lakwele Melika njengalokho esikubonileyo”
UMnu Mabutho Moyo owebandla le ZANU PF yena uthi okwenzakala kwele Melika akulani labo.
“Thina njengamaZimbabweans asiphatheki kangako kumpumela yokhetho lweMelika. Kumbe kuzangena uTrump lo uBiden. Thina esikufunayo yikuba bakhiphe izijeziso zomnotho ezaphiwa izijeziso zomnotho”
Kodwa ingcitshi ecubungula ezombusazwe, uMnu Pride Mkono uthi okumele ele Zimbabwe likufunde ngokwenzakala eMelika yikuba kulemithetho yokulungisa lapho ukhetho luthe lwaphambaniseka.
“Idemocracy ifuna ukuba kube lama institutions azimeleyo. Amadale awama states afana labo Geogia labo Pennslyvania lapho okufakwe khona indaba zika Trump balahlile indaba zika Trump, besithi kakulabufakzi. I electoral college yatsho ukuba uMnu Biden wanqoba”
Abasekeli bakaTrump bahlasele isakhiwo sedale lephalamende eseCapitol Hill ngemva kokutshotshozelwa nguye, esebenzisa inkundla zebulenjini, ezigoqela oTwitter, Facebook lezinye esithi bengavumi ukwamukela impumela yokhetho olwenziwe ngo Lwezi nyakenye.
UTrump unqotshwe kukhetho lokudinga umongameli weleMelika, ngu Mnu Joe Biden owebandla lama Democrats kodwa uyaphikisa impumela yokhetho lolu esithi waqilibezelwa lobanje kungela bufakazi abulethe emithethwandaba obuveza lokhu.
Kusenjalo inkundla zokuxhumana eze Twitter le Faceboook ezisetshenziswa nguTrump ukuxhumana labasekeli bakhe zimvalele ikhasi lakhe alisebenzisayo ngoba ezisebenzisa ukwethula amanga njalo etshotshozela abantu ukuphatheka kudlakela.