Uzulu weZimbabwe umanyene ngoLwesibili ekukhumbuleni owayengumsekeli kaMongameli welizwe uMnu Joshua Mqabuko Nkomo yena obhubhe mhlaka 1 ngoNtulikazi ngomnyaka ka1999.
Emkhosini oqhutshelwe koBulawayo, izikhulumeli ezigoqela indodana kaNkomo uMnu Sibangilizwe Nkomo, zikhuthaze uzulu ukuthi aqhubeke ephakamisa imbali lesibonelo esitshiywe nguNkomo.
Ngelanga leli ngo1999 lathula ithole lakoNyongolo ngemva kokulwisana lomkhuhlane wemvukuzane, kwaqhamuka isisilo esingelamkhawulo uzulu weZimbabwe ewisa ezimathonsi.
UNkomo wayengumuntu ohlonitshwayo kakhulu esaziwa ngesimilo esihle kanye lokunakekela abanye, engaziqakathekisi njalo engazigqaji lanxa nje ebengumsekeli kaMongameli welizwe.
Zehlake izinyembezi mhla zinye ngoNtulikazi ngo1999 inengi lizibuza ukuthi kambe elakusasa lelizwe lizakuma njani njengoba isidilikile intabenkulu ebiyinsika yelizwe.
Umnewabo kaMqabuko, uMnu Sam Sipepa Nkomo usibuyisele kulolosuku esibhedlela seParirenyatwa eHarare lapho uNyongolo abhubhele khona.
"Mzukwana ka30 June, umdala wayethe ngimbizele umfundisi uR.R Ndlovu owayengumkhokheli wamaSabatha, ngayamthatha uNdlovu ngabahlanganisa esibhedlela," kutsho uSipepa.
"Abadala bobabili bakhala izinyembezi, kwakhulekwa; ahhhhhh kuthe mina engangikhona ngakhala. Kuthe mhlaka 1... ladlula iqhawe leZimbabwe."
Indodakazi kamuyi, uNkosazana Thandiwe Nkomo uchaze uyiso njengomuntu wabantu otshiye isifundo esimele silandelwe nguzulu.
Inengi livumelana loThandi lisithi ukuzithoba kukaMqabuko yikho okwenza walobelana isivumelwano seUnity Accord leZanu PF ukuqeda umbuqazwe weGukurahundi eMatabeleland leMidlands ngomnyaka ka1987.
Uzulu wakoBulawayo yena ubambene ekukhumbuleni iqhawe lamaqhawe leli emkkhosini oqoqwe yinhlanganiso yeJoshua Nkomo Cultural Movement.
"Umcimbi wethu uphumelele kakhulu njengendlela ebesikhangelele ngayo," kutsho isiphathamandla salinhlanganiso, uMnu Mehluli Moyo.
Isikhulumeli seZanu PF, uMnu Rugare Gumbo, laye ukhumbule uNkomo ngamazwi alesithunzi, esithi uzulu kamelanga akhohle imbali ayitshiyileyo.
UNkomo ubeyindoda elomcabango ocijileyo efuna ilizwe liphumelela, uzulu ehlengwa kungavula zobumpofu njalo abantukazana bephiwa umhlabathi.
Kodwa umbuzo obalulekileyo uzulu lohulumende emele azibuze wona ngosuku lwalamhlanje ngowokuthi kambe izifiso zikaNkomo zisakhwabithwa na, njalo kukhona okwenziwayo ukuzifeza na?
Cha, akunjalo, kutsho ingcwethi kwezombusazwe njalo efundisa ezepolitiki ekolishini leUniversity of Huddersfield kweleBhilithani uMnu Nkululeko Sibanda.
UNkomo wazalwa ngomnyaka ka1918 njalo wabhubha eseleminyaka yokuzalwa engu82. Waba ngumsekeli kaMongameli Mugabe kusukela ngo1987 kwaze kwafika ilanga lakhe lokucina.
Idolobho lakoBulawayo selizame ukuqhubekisela phambili imbali yakhe ngokupha isitalada igama lakhe lokufaka isithombe sakhe esenziwe ngensimbi enkabadolobho.
