UMongameli Robert Mugabe uthi abantu akumelanga basole umphathintambo obona ngezamandla kagetsi uMnu Samuel Undenge ngokusilela kwamagetsi elizweni okuqhubeka kusiba kubi.
Ekhuluma ekufikeni kwakhe eHarare ngoLwesine eevela emhlanganweni weUnited Nations General Assembly, uMugabe uthe okwenze ukusilela kwamagetsi kwadlondlobala ngamanzi asilelayo edamu leKariba, hatshi ukwehluleka umsebenzi kukaUndenge.
Lanxa amagetsi ebevele eseleminyaka esilela elizweni, kulezinsuku asesilela ngamandla njalo endaweni ezinengi atshona engekho ilanga lonke.
Kusukela ngeviki edluleyo, iZesa icitsha amagetsi ngehola lika5 O’clock ekuseni atshone engekho aze avulwe ngehola lika 11 O’clock ebusuku abantu abenengi sebelele.
Lokhu sokutshiye uzulu labamabhizimusi bethwele nzima. Abalutshwana abalemali sebesebenzisa amandla esola.
Ingcwethi kwezombusazwe uMnu Rejoice Ngwenya uthi ukusilela kwamagetsi kuvesa sobala ukwehluleka ukubusa kuhle kweZanu PF.
"Ibandla leli elibusayo selibuse okweminyaka eminengi, ama priorities abo kamanga kuhle," kutsho uNgwenya.
"Sasivele sikwazi ukuthi idamu leKariba lizaphela amanzi. Kwakumele uhulumende abeke imali eceleni njalo sibe lobudlelwano obuhle lamanye amazwe angenza sithole amagetsi amanengi."
Amazwi kaNgwenya agcizelelwe yingcwethi kwezamandla kagetsi uMnu Nkosana Nyoni yena okhuthaze uhulumende ukuthi encedise abantu ngemali ukufaka amandla esolar ezindlini.
