Uzulu ubikwa esethandabuza ukuba inkulumo kaNkosikazi Grace Mugabe ayenze embuthanweni etshiyeneyo elizweni jikelele ebalisa ukuthi umsekeli kaMongameli Mugabe, uNkosikazi Joice Mujuru kasuke esihlalweni ingabe isekelwa nguMongameli Mugabe na?
Iphephandaba le Herald lithi lokhu kungaba liqiniso ngoba esuka ngomgqibelo uMongameli Mugabe esiya eRome lapho okugcotshwa kona uPapa ubonakale engakhulumisani kahle loNkosikazi Mujuru njengalokho ayake akwenze ngesikhathi esedluleyo.
Emihlanganweni elitshumi ayenzileyo ezigabeni zonke zelizwe, uNkosikazi Mugabe ubesola enye inkokheli esithi kayenzilutho ngokungezwani okusebandleni. Owake waba ngusibalukhulu wesigaba semidlands, uMnu. Cephas Msipa olilunga ledale elimqoka leZanu PF, ipolitburo, utshele uChris Gande weStudio Seven ukuthi ukudonselana amandla okusebandleni leZanu PF kumele kuqedwe ngesiphangiphangi.
Kunjalo nje, abanye abasekeli bebandla leZanu PF basola umkhokheli wabalwa impi yenkululeko, uMnu. Jabulani Sibanda, ukuthi kazange abonakale emhlanganweni kankosikazi mugabe ngitsho loyedwa. Usibanda utshele uChris Gande weStudio Seven ukuthi mpela kazange aye emhlanganweni le ngoba ubeleminye imihlangano kade eyiqoqile.